Fana: At a Speed of Life!

ኢራን ከየትኛውም ወገን የሚሰነዘርን ጥቃት ለመመከት ዝግጁ መሆኗን ገለጸች

አዲስ አበባ፣ መስከረም 10 ፣2012 (ኤፍ ቢ ሲ) ኢራን ከየትኛውም ሀገር የሚሰነዘርን ጥቃት ለመመከት ዝግጁ መሆኗን አስታውቃለች ።

በቅርቡ በሳዑዲ ዓረቢያ የነዳጅ ማጣሪያ ፋብሪካዎች ላይ ጥቃት መፈጸሙን ተከትሎ በመካከለኛው ምስራቅ ውጥረት መንገሱ ይታወቃል።

በቀጠናው የተፈጠረውን አለመረጋጋት ተከትሎም አሜሪካ ቁጥራቸው በውል ያልታወቁ ወታደሮችን ወደ ስፍራው ልትልክ መሆኑን አስታውቃለች።

ይህ የአሜሪካ ድርጊትም በነዳጅ ማቀነባባሪያ ፋብሪካዎች ላይ ጥቃት ፈፅማለች የተባለችው ኢራንን ክፉኛ ማስቆጣቱ ነው የተነገረው።

የኢራን አብዮት ዘብ ጠባቂ አዛዥ ጉዳዩን አስመልክተው በሰጡት መግለጫ፥ አሜሪካ እና አጋሮቿ ቀጠናውን ለማተራመስ የሚያከናውኑት ተግባር ሃላፊነት የጎደለው መሆኑን አንስተዋል።

ስለሆነም ሀገራቱ በመካከለኛው ምስራቅ የሚያከናውኑትን ጠብ አጫሪ እና ተገቢ ያልሆነ ትንኮሳ እንዲያቆሙ አስጠንቅቀዋል።

ይህ ካልሆነ ግን ኢራን ልዑላዊነቷን በመዳፈር ከማንኛውም ሀገር የሚቃጣን ጥቃት የመመከት አቅም ያላት መሆኑን ነው ያስታወቁት።

ጦርነት ፈፅሞ ሀገራችን ውስጥ እንዲገባ አንፈቅድም ያሉት አዛዡ፥ ከየትኛውን ወገን ለሚሰነዘር ጥቃት ጠንከር ያለ አጸፋዊ እርምጃ የሚወሰድ መሆኑን በአንክሮ ተናግረዋል።

ባሳለፍነው ሳምንት በሳዑዲ ዓረቢያ የነዳጅ ማጣሪያ ፋብሪካዎች ላይ ለተፈፀመው ጥቃት አሜሪካ እና ሳዑዲ አረቢያ ኢራንን ተጠያቂ ያደርጋሉ።

ይሁን እንጂ በየመን ውስጥ የሚንቀሳቀሰውእና በኢራን እንደሚደገፍ የሚነገርለት የሀውቲ አማጽያን ቡድን ለጥቃቱ ሃላፊነቱን ወስዷል።

ምንጭ ፦ቢቢሲ

You might also like
Comments
Loading...