Fana: At a Speed of Life!

አልነጃሺ ሰው ልዩነት ሳያሳይ የኖረበት ታሪካዊ ስፍራና ብዙ ትምህርት የሚወሰድበት ነው- ዶ/ር ደብረጽዮን

አዲስ አበባ፣ ጳጉሜን 5፣ 2011 (ኤፍ.ቢ.ሲ) አልነጃሺ ሰው በሀይማኖቱ፣ በቋንቋውና በባህሉ ምንም ልዩነት ሳያሳይ በሰላምና በጋራ የኖረበት ታሪካዊ ስፍራና ብዙ ትምህርት የሚወሰድበት ነው አሉ የትግራይ ክልል ምክትል ርዕሰ መስተዳድር ዶክተር ደብረፅዮን ገብረሚካኤል።

1 ሺህ 441ኛ የአሹራ በዓል በትግራይ ክልል አልነጃሺ መስጂድ በድምቀት ተከብሯል።

በበዓሉ ላይም የትግራይ ክልል ምክትል ርዕሰ መስተዳድር ዶክተር ደብረፅዮን ገብረሚካኤል፣ የኢትዮጵያ እስልምና ጉዳዮች ጠቅላይ ምክር ቤት ፕሬዚዳንት ሙፍቲ ሀጂ ኡመር እድሪስን እና ከተለያዩ የሀገሪቱ አካባቢዎች የተገኙ ምዕመናንን ጨምሮ ከሱዳን፣ ኤርትራና ከጅቡቲ የመጡ እንግዶች ተሳትፈዋል።

የትግራይ ክልል ምክትል ርዕሰ መስተዳድር ዶክተር ደብረፅዮን ገብረሚካኤል ባስተላለፉት መልእክትም፥ አልነጃሺ የውጭ ዜጎች ብቻ ሳይሆን ኢትዮጰያውያንም ብዙ ሊያውቁት የሚገባ ታሪካዊ ስፍራ ነው።

አልነጃሺ በቋንቋ፣ በባህልና በዕምነት የማይገናኙ ህዝቦች በጋራና በሰላም የኖሩበት ስፍራ መሆኑንም አመልክተዋል።

በአሁኑ ወቅት በአንዳንድ አካባቢዎች ዜጎች በማንነታቸውና በቋንቋቸው ለጥቃት የሚጋለጡበት አጋጣሚ መስተዋሉን የጠቆሙት ዶክተር ደብረጽዮን፥ “ከአልነጃሺ ስለሰላምና አብሮነት መማር ይቻላል” ብለዋል።

አልነጃሺ ታሪካዊነቱ በዓለም አቀፍ ጭምር ጎልቶ እንዲታወቅ የትግራይ ብሔራዊ ክልላዊ መንግስት ድጋፉን እንደሚያደርግም አረጋግጠዋል።

የኢትዮጵያ እስልምና ጉዳዮች ጠቅላይ ምክር ቤት ፕሬዚዳንት ሙፍቲ ሀጂ ኡመር እድሪስ በበኩላቸው፥ አልነጃሺ የመልካምነት ማሳያ መሆኑን ጠቅሰው፣ የትግራይ ህዝብ እንግዳ ተቀባይ መሆኑን አመልክተዋል።

ምንጭ፦ ኢዜአ

You might also like
Comments
Loading...