Fana: At a Speed of Life!

ናይጀሪያ ከደቡብ አፍሪካ 640 ዜጎቿን ልታስወጣ ነው  

አዲስ አበባ ፣ ጳጉሜን 5 ፣ 2011 (ኤፍ ቢ ሲ) ናይጀሪያ ከደቡብ አፍሪካ 640 ዜጎቿን ልታስወጣ መሆኑን አስታወቀች።

የናይጀሪያ ዳያስፖራ ኮሚሽን ሊቀ መንበር ዳቢሪ ኢሬዋ እንዳሉት በደቡብ አፍሪካ በውጭ ሃገር ዜጎች ላይ እየደረሰ ያለውን ጥቃት ተከትሎ መንግስት 640 ዜጎቹን ሊያስወጣ ነው።

እንደ እርሳቸው ገለጻ ነገ በሚጀመረው የማስወጣት ሂደት የመመለስ ፍላጎት ያላቸው 640 ናይጀሪያውያን ወደ አቡጃ ይመለሳሉ።

የናይጀሪያው ፕሬዚዳንት ሙሃማዱ ቡሃሪ በደቡብ አፍሪካ በሚገኙ ናይጀሪያውያን ላይ እየተፈጸመ ያለውን ጥቃት በፅኑ አውግዘው የሲሪል ራማፎሳ አስተዳደር ለጉዳዩ አስቸኳይ መፍትሄ እንዲሰጠው ጠይቀዋል።

በደቡብ አፍሪካ በውጭ ሃገር ዜጎች ላይ እየተፈጸመ ካለው ጥቃት ጋር ተያይዞ እስካሁን ሁለት የውጭ ሃገር ዜጎችን ጨምሮ 10 ሰዎች መገደላቸው ይነገራል።

ጥቃቱ በዋናነት ኢትዮጵያውያንን ጨምሮ የናይጀሪያ፣ የዛምቢያ እና ኬንያውያን ዜጎችን እና በእነርሱ የሚተዳደሩ የንግድ ተቋማትን ኢላማ ያደረገ ነው።

ከጉዳዩ ጋር በተያያዘ ናይጀሪያ በደቡብ አፍሪካ አምባሳደሯን የጠራች ሲሆን፥ ናይጀሪያውያን ዜጎች ደግሞ በናይጀሪያ በሚገኙ ደቡብ አፍሪካውያን የሚተዳደሩ የንግድ ተቋማት ላይ ጉዳት ማድረሳቸው ተነግሯል።

በአንጻሩ ማዳጋስካር እና ዛምቢያ ከደቡብ አፍሪካ ጋር የእግር ኳስ ጨዋታዎችን ላለማድረግ ወስነዋል።

 

ምንጭ፦ ሲ ኤን ኤን

 

You might also like
Comments
Loading...