Fana: At a Speed of Life!

ቤንያሚን ኔታኒያሁና ቭላድሚር ፑቲን በቀጠናዊ ጉዳዮች ዙሪያ ሊወያዩ ነው

አዲስ አበባ፣ መስከረም 1፣ 2012 (ኤፍ ቢ ሲ) የእስራኤል ጠቅላይ ሚኒስትር ቤንያሚን ኔታኒያሁ እና የሩሲያው ፕሬዚዳንት ቭላድሚር ፑቲን በቀጠናዊ ጉዳዮች ዙሪያ ሊወያዩ ነው።

ጠቅላይ ሚኒስትር ቤንያሚን ኔታንያሁ በዛሬው ዕለት ለይፋዊ የሥራ ጉብኝት ወደ ሩሲያ የሚያቀኑ መሆኑን የሀገሪቱ ጠቅላይ ሚኒስትር ፅህፈት ቤት አስታውቋል።

ኔታንያሁ በሩሲያ በሚኖራቸው የአንድ ቀን ጉብኝትም ከሀገሪቱ ፕሬዚዳንት ቭላድሚር ፑቲን ጋር በሀገራቱ አካባቢያዊና ቀጠናዊ ጉዳዮች ዙሪያ ይወያያሉ ተብሎ ይጠበቃል።

ከዚህ ባለፈም  ከሩሲያ መከላከያ ሚኒስትር ሰርጌይ ሾይጉ እና ከሀገሪቱ የተለያዩ  ከፍተኛ የደህንነትና የጸጥታ ሃላፊዎች ጋር  በተለያዩ ጉዳዮች ዙሪያ የሚመክሩ መሆኑ ተገልጿል።

በውይይታቸውም  በቀጠናው ባለው ሰላም ዙሪያ በተለይም በሶሪያ ያለውን ቀውስ ማስወገድ በሚቻልባቸው ጉዳዮች ዙሪያ ትኩረት አድርገው እንደሚመክሩ ይጠበቃል።

በሌላ በኩል የኔታንያሁ ጉብኝት ዋና አላማ እስራኤል በሰሜን አቅጣጫ ከሶሪያ ጋር በምትዋሰንብት አካባቢ የሚገኙ የኢራን ወታደሮች ቦታውን ለቀው እንዲወጡ በሚቻልበት ሁኔታ ላይ ለመምከር መሆኑ በዘገባው ተመላክቷል።

ይህም  በኢራን ደጋፊነት በቀጠናው የሚንቀሳቀሱ የሂዝቦላህ  እና መሰል ታጣቂዎችን በቀላሉ ለማስወገድ የሚያስችል ዕቅድ  መሆኑ ተነግሯል።

 

ምንጭ፦ሺንዋ

You might also like
Comments
Loading...