Fana: At a Speed of Life!

ባሳለፍነው ዓመት 1 ነጥብ 6 ቢሊየን ብር ግምት ያላቸው የኮንትሮባንድ እቃዎች ተይዘዋል

አዲስ አበባ፣ መስከረም 2፣ 2012 (ኤፍ.ቢ.ሲ) ባሳለፍነው ዓመት 1 ነጥብ 6 ቢሊየን ብር ግምት ያላቸው የኮንትሮባንድ እቃዎች መያዛቸውን የጉምሩክ ኮሚሽን አስታወቀ።

የጉምሩክ ኮሚሽን ኮሚሽነር አቶ ደበሌ ቃበታ ከፋና ብሮድካስቲንግ ኮርፖሬት ጋር በነበራቸው ቆይታ እንዳሉት፥ በተጠናቀቀው 2011 የበጀት አመት የኮንትሮባንድ ሰንሰለትን ለመቆጣጠር በተሰራው ስራ 1 ሺህ 775 ተጠርጣሪዎች ጉዳያቸው በህግ ተይዟል።

ከተጠርጣሪወች ጋር የተመሳጠሩ 29 ተቆጣጣሪዎችም እርምጃ ተወስዶባቸዋል ነው ያሉት።

በአንድ ጀንበር በቦሌ አውሮፕላን ማረፊያ ግለሰቦች በህጋዊ ሽፋን 219 ሚሊየን ብር የኮንትሮባንድ እቃዎች ሲያስገቡ በቁጥጥር ስር መዋላቸውን አስታውሰዋል።

ሰንሰለቱ እስከ መንግስት የስራ ሀላፊዎች ድረስ የተዘረጋ በመሆኑ የሂደቱን መሪ ተዋናዮች ለማግኘት አዳጋች እንደነበርም አንስተዋል።

የጦር መሳሪያ፣ የቁም እንስሳት፣ ለውጭ ንግድ የሚቀርቡ የግብርና ምርቶች ዋነኛ በኮንትሮባንድ ሲዘዋወሩ እንደነበርም ገልጸዋል።

ከዚህ ጋር ተያይዞ በተደረገ ቁጥጥር 1 ነጥብ 6 ቢሊየን ብር የሚገመት ዋጋ ያላቸው ንብረቶችን መያዝ ተችሏል ብለዋል፤ አካሄዱ ህጋዊ ነጋዴዎችን የማቀጨጭ አዝማሚያ እንደነበረው በመጥቀስ።

ከዚህ ባለፈም በተጠናቀቀው አመት 334 ሚሊየን ብር በኮንትሮባንድ ሊወጣ ሲል መያዝ መቻሉንም አስረድተዋል።

አሁን ላይም ኮሚሽኑ ህገ ወጥነትን የመቆጣጠሪያ ስርዓት ለመዘርጋት የመዋቅር ማሻሻያ እና በመቆጣጠሪያ ጣቢያዎች የአዲስ የሰው ሀይል ምደባ እያከናወነ መሆኑንም ጠቅሰዋል።

የህግ ተጠያቂነትን በማስፈን እርምጃ ከመውሰድ አንጻር እየተሰሩ ያሉ ስራዎችም ተጠናክረው እንደሚቀጥሉም አውስተዋል።

በሀይለየሱስ መኮንን

You might also like
Comments
Loading...