Fana: At a Speed of Life!

ባለ መኝታ ክፍሉ የኳታር የ2022 የዓለም ዋንጫ ስታዲየም

አዲስ አበባ፣ መስከረም 7፣ 2012 (ኤፍ.ቢ.ሲ) የ2022 የዓለም ዋንጫ አስተናጋጇ ኳታር ዝግጅት ላይ ስትሆን ከእነዚህም ውስጥ የስታዲየሞች ግንባታ አንዱ ነው።

የአብዛኞቹ ስታዲየሞች ግንባታ ወደ መገባደድ መጠጋቱን ተከትሎም በስታዲየሞቹ የተገጠሙ ቅንጡ የሆኑ አዳዲ እና ያልተለመዱ ነገሮች መሰማት ጀምረዋል።

ከእነዚህም ውስጥ ባሳለፍነው ሰኞ በማህበራዊ ትስስር ትደረ ገጾች የተለቀቀው ቪዲዮ አል በያት የተባለውን ስታዲየም የሚያሳይ ሲሆን፥ ቪዲዮውም በስታዲየሙ ውስጥ መኝታ ክፍል ይዞ ኳስ መመልከት የሚያስችል ስፍራ እንዳለ የሚያሳይ ነው።

በስታዲየሙ የእግር ኳስ ተመልካቾች መቀመጫ መሃል ላይ የተሰሩ መኝታ ክፍሎቹ በሆቴሎች መኝታ ክፍል ደረጃ የተገነቡ ሲሆን፥ በመስታወት የተጋረዱ እና እዛው ውስጥ ሆኖ ኳስ መመልከት የሚያስችሉ ናቸው ተብሏል።

በኳታር በረሃዎች ውስጥ በስፋት የሚሰሩ ድንኳኖች ቅርጽን ተከትሎ የተሰራው የአል በያት ስታዲየም ግንባታ በቀጣይ ሳምንት ሙሉ በሙሉ ይጠናቀቃል ተብሏል።

ስታዲየሙ ከመኝታ ክፍሎች በተጨማሪ ሰው ሰራሽ ወንዝ እና የመናፈሻ ፓርክ ያለው መሆኑም ተነግሯል።

የአል በያት ስታዲየም ግንባታ ሙሉ በሙሉ በሚጠናቀቅበት ጊዜም 60 ሺህ ተመልካቾችን የመያዝ አቅም ያለው መሆኑም ተነግሯል።

ኳታር ለ2022 የዓለም ዋንጫ 8 ስታዲየሞችን በማዘጋጀት ላይ ስትሆን፥ ከእነዚህም ውስጥ ሰባት ስታዲየሞች ሙሉ በሙሉ አዲስ በግንባታ ላይ የሚገኙ ናቸው።

8ኛው ስታዲየም ደግሞ ከሊፋ ኢንተርናሺናል ስታዲየም ሲሆን፥ ሙሉ በሙሉ እድሳት ተደርጎለት ባሳለፍነው ዓመት ግንቦት ወር ላይ ክፍት መደረጉ ይታወሳል።

ምንጭ፦ www.aljazeera.com

You might also like
Comments
Loading...