Fana: At a Speed of Life!

ባለሃብቶች ውጤታማ እንዲሆኑ ተግዳሮቶችን የመፍታት ስራ እየሰራ መሆኑን የንግድና ኢንዱስትሪ ሚኒስቴር አስታወቀ

አዲስ አበባ ፣ መስከረም 6 ፣ 2012 (ኤፍ ቢ ሲ) ኢንቨስትመንትን ወደ ሃገር ውስጥ ከመሳብ ባለፈ ባለሃብቶች ውጤታማ እንዲሆኑ ተግዳሮቶችን የመፍታት ስራ እየተሰራ መሆኑን የንግድና ኢንዱስትሪ ሚኒስቴር አስታወቀ።

የኢትዮጵያና የዱባይ ዳያስፖራ ቢዝነስ ፎረም በአዲስ አበባ አያት ሪጀንሲ ሆቴል እየተካሄደ ነው።

ፎረሙ የሃገራቱን የሁለትዮሽ ግንኙነት በማጠናከር ረገድ ከፍ ያለ ሚና እንዳለው የንግድና ኢንዱስትሪ ሚኒስትር ዲኤታው አምባሳደር ምስጋኑ አረጋ ተናግረዋል።

ሚኒስትር ዲኤታው አያይዘውም ሃገራቱ የጀመሯቸው የንግድ ግንኙነቶች፥ ቀጥተኛ ኢንቨስትመንትን ወደ ሃገር ውስጥ በመሳብ ረገድ አስተዋጽኦ እንዳላቸውም አንስተዋል።

ሃገራቱ በቅርቡ የኢንቨስትመንት ጥበቃና ድጋፍ መፈራረማቸውን ያነሱት ሚኒስትር ዲኤታው፥ ኢትዮጵያ ከተባበሩት ዓረብ ኢሚሬቶች ጋር ያላትን የህዝብ ለህዝብ እና የንግድ ግንኙነት ለማጠናከር እየሰራች መሆኑን ገልጸዋል።

አያይዘውም ምርትን እሴት ጨምሮ ወደ ውጭ በመላክ በኩል ያለውን ውስንነት ለመቅረፍ ኢትዮጵያ ከተባበሩት ዓረብ ኢሚሬቶች ልምድ ትወስዳለችም ነው ያሉት።

የንግድ ሚዛንን ለማሳደግም ወደ ውጭ የሚላክ ምርትን በአይነት፣ በመጠን እና በጥራት ለማሳዳግ ይሰራልም ብለዋል።

እስከ ነገ በሚቆየው የቢዝነስ ፎረም ከሁለቱ ሃገራት የተውጣጡ የንግድና ቢዝነስ ልዑካን እየተሳተፉ ይገኛል።

ፎረሙም የሃገራቱን ባለሃብቶች እንዲተዋወቁና ልምድ እንዲለዋወጡ በማድረግ የኢንቨስትመንት አማራጮችን ለማስተዋወቅ እንደሚረዳ ታምኖበታል።

 

በአወል አበራ

You might also like
Comments
Loading...