Fana: At a Speed of Life!

በ17ኛው የዓለም አትሌቲክስ ሻምፒዮና ላይ የሚሳተፈው የመጀመሪያው የኢትዮጵያ ልዑክ ዶሃ ገባ

አዲስ አበባ ፣ መስከረም 14 ፣ 2012 (ኤፍ ቢ ሲ) በኳታር በሚካሄደው 17ኛው የዓለም አትሌቲክስ ሻምፒዮና ላይ የሚሳተፈው የመጀመሪያው የኢትዮጵያ አትሌቲክስ ቡድን ዶሃ በሰላም ገብቷል።

የኢትዮጵያ አትሌቲክስ ፌዴሬሽን ተቀዳሚ ምክትል ፕሬዚዳንት አትሌት ደራርቱ ቱሉ፣ የፅህፈት ቤት ሃላፊ አቶ ቢልልኝ መቆያ እና በኳታር የኢትዮጵያ ባለሙሉ ሥልጣን አምባሳደር ሳሚያ ዘካርያ ለቡድኑ አቀባበል አድርገውለታል።

ኢትዮጵያ በሻምፒዮናው በመካከለኛ፣ በረጅም ርቀት እና በሃገር አቋራጭ የሩጫ ውድድር ትካፈላለች።

በእነዚህ ርቀቶች ኢትዮጵያን የሚወክሉ አትሌቶችም ከነገ በስቲያ ዓርብ የማጣሪያ እና የፍጻሜ ውድድራቸውን የሚያደርጉ ይሆናል።

በዚህ መሰረት በሴቶች ማራቶን ኢትዮጵያ በአትሌት ሮዛ ደረጄ፣ ሩቲ አጋ እና ሹሬ ደምሴ ስትወከል ዓርብ ሌሊት 6 ሰዓት ላይ የፍጻሜ ውድድራቸውን ያካሂዳሉ።

በሴቶች 800 ሜትር ደግሞ አትሌት ደርቤ ወልተጂ ዓርብ ከቀኑ 11 ሰዓት ከ10 ላይ ማጣሪያ ታደርጋለች።

በወንዶች 5 ሺህ ሜትር ደግሞ አትሌት ጥላሁን ኃይሌ፣ ሙክታር ኢድሪስ፣ ሰለሞን ባረጋ እና አባዲ ሃዲስ ሃገራቸውን ወክለው ይሳተፋሉ።

ዓርብ ከምሽቱ 1 ሰዓት ከ55 ላይ ማጣሪያቸውን ያደርጋሉ።

በሴቶች 3 ሺህ ሜትር ውድድር አትሌት መቅደስ አበበ፣ ዘርፌ ልመንህ እና ሎሚ ሙለታ ሃገራቸውን ሲወክሉ፥ ዓርብ ምሽት 1 ሰዓት ላይ ማጣሪያቸውን እንደሚያደርጉ ከኢትዮጵያ አትሌቲክስ ፌዴሬሽን ያገኘነው መረጃ ያመላክታል።

ቀሪ የአትሌቲክስ ቡድኑ አባላት በቀጣይ ቀናት የሚገቡ ይሆናል።

 

You might also like
Comments
Loading...