Fana: At a Speed of Life!

በጅማ ቤተ ክርስቲያን ተቃጠለ በሚል የተሰራጨው መረጃ ሀሰት መሆኑ ተገለፀ

አዲስ አበባ፣ ጳጉሜን 5፣ 2011 (ኤፍ.ቢ.ሲ) በጅማ ከተማ ቤተ ክርስትያን ተቃጠለ በሚል የተሰራጨው መረጃ ሀሰት መሆኑን የተገለፀ።

የኦሮሚያ መንግስት ኮሙዩኒኬሽን ጉዳዮች ቢሮ እንዳስታወቀው፥ በትላንትናዉ እለት በጅማ ከተማ ቤተ ክርስቲያን ተቃጠለ፣ መስቀል ተቃጠለ፣ የክርስቲኖች ንብረት ተዘረፈ ተብሎ በማህበራዊ ሚዲያ የሚነዛዉ ወሬ ሀሰት ነው።

በከተማዉ የተቃጠለ ቤተ እምነትም ሆነ መስቀል የለም፣ ንብረት ተዘረፈ የሚባለዉም የሁከት ፈጣሪዎች አሉባልታ ነው ብሏል ቢሮው።

አሉባልታዉ ሀይማኖትን ሽፋን በማድረግ ሁከትና ብጥብጥ ለመፍጠር የተቀነባበረ የጥፋት ሴራ መሆኑንም አስታውቋል።

ሁከት ፈጣሪዎችን የመለየቱና ለህግ የማቅረቡ ስራ እየተሰራ ያለው ቢሮው፥ ሁከቱን በማክሸፍ ሰላሙን ለመጠበቅ ህብረተሰቡ ያደረገዉ ተሳትፎ የሚበረታታና ተጠናክሮ መቀጠል ያለበት ነው ብሏል።

በተመሳሳይ መልኩ በሀይማኖት ሽፋን ሰላማዊ ሰልፍ ሊካሄድ ነዉ ተብሎ የሚነዛዉ ወሬም አሉባልታና በመንግስት እዉቅና ያሌለዉ የሀሰት መረጃ መሆኑን አስታውቋል።

ሰላማዊ ሰልፍ አካሂዳለዉ ብሎ የጠየቀ ህጋዊ አካልም የለም፣ የፈቀደም አካልም የለም ያለው ቢሮው፥ መንግስት በማንኛዉም ህገ ወጥ እንቅስቃሴ ላይ ህጋዊ እርምጃ የሚወስድ ይሆናል ብሏል።

መንግስት የህዝቡን ሰላምና ደህንነት የማስጠበቅ ሀላፊነት ስላለበት የፀጥታ አካላት በማንኛዉም ህገ ወጥ እንቅስቃሴ ላይ እርምጃ እንዲወስድ መመሪያ መተላለፉንም ገልጿል።

ህብረተሰቡ በአፍራሽ ሀይሎች ከሚነዛዉ አሉባልታ እራሱን በመቆጠብ የጀመረዉን የራሱንና የአካባቢዉን ሰላም የማስከበር ተሳትፎዉን አጠናክሮ እንዲቀጥልም ጥሪ አቅርቧል።

የኦሮሚያ ፖሊስ ኮሚሽን ኮሚሽነር ጄነራል ከፍያለው ተፈራም በዛሬው እለት በሰጡት መግለጫ፥ በትናንትናው እለት በጅማ ከተማ የሚገኘው ቅድስተ ማርያም ቤተ ክርስቲያንና መስቀል ተቃጥሏል በሚል የቤተ ክርስትያን ደወል በመደወል እንዲሁም በማህበራዊ ሚዲያዎች እና በስልክ መረጃ በመለዋወጥ ግርግር ተፍጥሮ ነበር ብለዋል።

ኮሚሽነር ጄነራል ከፍያለው ተፈራ በጅማ ከተማ የሚገኘው የቅድስት ማርያም ቤተ ክርስቲያን እና መስቀል ተቃጥሏል በሚል የተሰራጨው ሀሰት መሆኑን የገለጹ ሲሆን፥ በከተማዋ ተፈጥሮ የነበረው ግርግርም መረጋጋቱን አስታውቀዋል።

በአሁኑ ወቅትም ጉዳዩ በሽምግልና እየተፈታ መሆኑንም ነው በመግለጫቸው ያስታወቁት።

ኮሚሽነር ጄነራል ከፍያለው ተፈራ አክለውም፥ በኦሮሚያ ክልል የተፈቀደ ሰላማዊ ሰልፍ እድሌለና የሚደረጉ ሰላማዊ ሰልፎችም ተቀባይነት የሌላቸው መሆኑን ገልፀዋል።

You might also like
Comments
Loading...