Fana: At a Speed of Life!

በድሬዳዋ ከተማ በችኩንጉኒያ ወረርሽኝ የተያዙ ሰዎች ቁጥር 20 ሺህ በላይ ደርሷል

አዲስ አበባ፣ ነሃሴ 27፣2011 (ኤፍ ቢ ሲ) በድሬዳዋ ከተማ በችኩን ጉኒያ ወረርሽኝ የተያዙ ሰዎች ቁጥር 20 ሺህ በላይ መድረሱን የኢትዮጵያ የሕብረተሰብ ጤና ኢንስቲትዩት አስታውቋል።

ኢንስቲትዩቱ በዛሩው ዕለት በሀገሪ የተከሰቱ  የችኩንጉኒያ፣ የኮሌራና፣ የፖሊዮ ወረርሽኞችን ለመቆጣጠርና ለመከላከል እየተከናወኑ ያሉትን የቅድመ ዝግጅት ተግባራት አስመልክቶ ጋዜጣዊ መግለጫ ሰጥቷል።

በመግለጫውም በድሬዳዋ ከተማ በችኩንጉኒያ ወረርሽኝ የተያዙ ሰዎች ቁጥር 20 ሺህ የደረሰ ሲሆን፥እስከ አሁን ድረስ የተመዘገበ ሞት የለም፡፡
በተደረገ የቤት ለቤት አሰሳ 86 ፐርሰንት የሚሆኑት ቤቶች ወረርሽኙን የሚያስተላልፈው ትንኞች እጭ የተገኘባቸው መሆኑም ተገልጿል።

ወረርሽኙን ለመቆጣጠር ከድሬዳዋ አስተዳደር፣ከኢትዮጵያ ሕብረተሰብ ጤና ኢንስቲትዩት እንዲሁም ከአጋር ድርጅቶች የተውጣጣ ፈጣን ምላሽ ሰጪ ቡድን በቦታው በመገኘት የተቀናጀ ምላሽ በመስጠት ላይ ይገኛል፡፡

ወረርሽኙን ባጭር ጊዜ ውስጥ ለመቆጣጠር በክንቲባ ፅ/ቤት የሚመራ ግብረሃል ተቋቁሞ በቅንጅት እየተሰራ የሚገኝ ሲሆን፥ከእነዚህም ዉስጥ የቤት ለቤት ርጭት፣ የቅኝት እና አሰሳ ስራዎች፣ የማህበረሰብ ንቅናቄ፣ የህክምና አገልግሎት በሁሉም ጤና ተቋማቶች የመስጠት ስራዎች ዋነኞቹ መሆናቸው ተመላክቷል፡፡

ማህበረሰቡ ከበሽታው እራሱን መከላከል እንዲችል ለሃይማኖት አባቶች፣አመራሮች፣ለማህበረሰብ መሪዎች እንዲሁም ለመገናኛብዙሃን ባለሙያዎች በአጠቃላይ ለ125 ሰዎች ስልጠና ተሰጥቷል፡፡

ከዚህም ጋር በተያያዘ የኢትዮጵያ ሕብረተሰብ ጤና ኢንስቲትዩት ለምላሽ አሰጣጡ የሚያገዙ የባለሙያ፣ የኬሚካል፣የመድኃኒትና የህክምና ቁሳቁሶች ድጋፍ ለድሬዳዋ አስተዳደር ጤና ቢሮ እያደረገ ይገኛል፤ በተጨማሪም የ 1ነጥብ 2 ሚሊየን ብር ድጋፍ ማድረጉ ነው የተገጸው።

ሕብረተሰቡ ለትንኝ ንክሻ ከሚያጋልጡ ሁኔታዎች ራሱን መጠበቅ ይኖርበታል፤ በማንኛውም ጊዜ ሙሉ ሰውነትን የሚሸፍን ልብስ መልበስ፣ የትንኝ መከላከያ ቅባት በቆዳ ላይ መቀባትና በሚተኙበት ጊዜ ሁሉ የአልጋ አጎበር በመጠቀም ራስን ከትንኝ ንክሻ መጠበቅ እንደሚያስፈልግም ተጠቁሟል።

የኮሌራ ወረርሽኝን በተመለከተም በሀገሪቱ ተከስቶ የነበረውን የኮሌራ ወረርሽኝ በአብዛኛው ሙሉ በሙሉ መቆጣጠር የተቻለ ሲሆን፥ በአሁኑ ሰዓት በኦሮሚያ፣በደቡብና ሀርሪ ክልል ላይ በሽታው አልፎ አልፎ እየታየ መሆኑ ተነግሯል።

የፖሊዮ (የልጅነት ልምሻ በሽታ ) በሶማሌ ክልል ዶሎ ዞን ቦህ ወረዳ አንጋሎ ቀበሌ በግንቦት ወር 2011ዓ.ም መከሰቱ ይታወቃል፡፡

ይህን ተከትሎም የፖሊዮ ቫይረስ ስርጭትን ለመግታት እንዲሁም የህፃናትን የፖሊዮ በሽታ የመከላከል አቅምን ለማጎልበት በሱማሌ ክልል በአምስት ዞኖች (በዶሎ፣ጀረር፣ፋፋን፣ኖጎብና ኤረር) በሚገኙ 48 ወረዳዎች እንዲሁም 5 ተፈናቃይና 3 ስደተኛ ጣቢያዎች ውስጥ ለሚገኙ እድሜቸው ከአምስት አመት በታች ለሆኑ ከ 500 ሺህ በላይ ህፃናት ክትባት ተሳጥቷል።

በቀጣይም በነዚሁ ቦታዎች ቀድሞ ለተከተቡ ህፃናት ከመስከረም 5 እስከ 8 ቀን 2011 ዓ.ም የዘመቻ ክትባት የሚከናወን መሆኑ ነው የተገለጸው ።

የድንበር ተሸጋሪ የፖሊዮ ወረርሽኝን ለመከላከልና ለመቆጣጠር እንዲቻል ከሶማሌ ላንድና ፑንት ላንድ የጤና አመራሮች ጋር ውይይት ተደርጎ  በቅንጅት እየጠሰራ መሆኑ በመግለጫው ተመላክቷል።

You might also like
Comments
Loading...