Fana: At a Speed of Life!

የዋጋ ንረትን ለመፍታት ከባለድርሻ አካላት ጋር እየተሰራ ነው – የንግድና ኢንዱስትሪ ሚኒስቴር

አዲስ አበባ ፣ ነሃሴ 27 ፣ 2011 (ኤፍ ቢ ሲ) በሃገሪቱ በፍጆታ እቃዎች እና በአገልግሎት ምርቶች ላይ የሚስተዋለውን የዋጋ ንረት ለመፍታት መንግስት ከባለድርሻ አካላት ጋር እየሰራ መሆኑን የንግድና ኢንዱስትሪ ሚኒስትሯ ወይዘሮ ፈትለወርቅ ገብረእግዚአብሄር ተናገሩ።

የንግድ እና ኢንዱስትሪ ሚኒስቴር በፍጆታ እቃዎች እና በአገልግሎት ላይ በሚስተዋለው የዋጋ ንረት ዙሪያ ከንግዱ ማህበረሰብ አባላት ጋር ተወያይቷል።

በውይይቱ ላይ ንግግር ያደረጉት ሚኒስትሯ የሚስተዋለው የዋጋ ንረት በህብረተሰቡ ላይ ከፍተኛ ጫና መፍጠሩን አንስተዋል።

ህገ ወጥ ንግድና ኮንትሮባንድ፣ ሰው ሰራሽ የምርት እጥረት፣ ያለደረሰኝ ግብይት መፈፀም እና ሃሰተኛ ደረሰኝ አሁን ላይ ለሚስተዋለው የዋጋ ንረት ምክንያት መሆናቸውንም ተናግረዋል።

ከዚህ ባለፈም የህብረት ስራ ማህበራት የአቅም ውስንነት ለዋጋ ንረቱ ምክንያት መሆኑም ጠቅሰዋል።

በግብይት ሰንሰለቱ የተሰማሩ ደላሎችም የምርቶች ዋጋ አላግባብ እንዲያሻቅብ በማድረግ ችግሩን እያባባሱት መሆኑንም አስረድተዋል።

ምክንያት የሌለውን የዋጋ ንረት ለመፍታትም የዘርፉ ባለድርሻዎች በቅንጅት መስራት እንዳለባቸው አሳስበዋል።

በመድረኩ ላይ በፍጆታ እቃዎች ላይ ያለው የዋጋ ግሽበት ከታህሳስ ወር ጀምሮ ወደ ሁለት አሃዝ ከፍ እያለ መምጣቱ የተነሳ ሲሆን፥ አሁን ላይም የዋጋ ግሽበቱ ከ15 በመቶ ላይ ደርሷል ነው የተባለው።

ገበያ ላይ የምርት እጥረት የለም ያለው ሚኒስቴር መስሪያ ቤቱ፥ ህገ ወጥ ነጋዴዎች የምርት እጥረት እንዳለ በማስመሰል የዋጋ ጭማሪ እንደሚያደርጉም አስታውቋል።

ሚኒስትሯ በበኩላቸው መንግስት ከውጭ የሚገቡ የፍጆታ እቃዎችን በሃገር ውስጥ ምርት በመተካት የሃገር ውስጥ ምርትን በበቂ ሁኔታ በማቅረብ ለዋጋ ንረቱ መፍትሄ መስጠት እንደሚችል ገልጸዋል።

በውይይቱ ላይ የአምራች ኢንዱስትሪ ባለቤቶች፣ አስመጪዎች፣ አከፋፋዮች እና የፌደራል፣ የአዲስ አበባ እና የኦሮሚያ ክልል የዘርፉ አመራሮች ተሳትፈዋል።

በመድረኩ የዋጋ ንረትን እና ህገ ወጥነትን መከላከልና መቆጣጠር በሚቻልበት አግባብ ዙሪያም ምክክር ተደርጓል።

 

 

በሃይለየሱስ መኮንን

You might also like
Comments
Loading...