Fana: At a Speed of Life!

በወጪ  ንግድ የተሰማሩ ላኪዎች ፈቃድ ኦዲት ሊደረግ ነው

አዲስ አበባ፣ ነሃሴ 30፣ 2011 (ኤፍ.ቢ.ሲ) በወጪ  ንግድ የተሰማሩ ላኪዎች ፍቃድ ኦዲት ሊደረግ መሆኑ ተገለፀ።

በቀጣዩ ጥቅምት 1 ቀን 2012 ዓ.ም ጀምሮ በኢኮኖሚ አሻጥር የተሰማሩትን ላኪዎች ለመለየት የኮንትራት አስተዳደር ስርዓት ይዘረጋል ተብሏል።

የንግድ እና ኢንዱስትሪ ሚኒስቴር ለፋና ብሮድካስቲንግ ኮርፖሬት እንደገለፀው፥ ለወጪ ንግድ የሚቀርቡ ምርቶችን በኮንትሮባንድ በመሸጥ የውጭ ምንዛሬ እያሳጡ በሚገኙት አካላት ላይ ፍቃድ እስከመሰረዝ የደረሰ እርምጃ ይወሰዳል።

የንግድ እና ኢንዱስትሪ ሚኒስቴር ሚኒስትር ዴኤታ አምባሳደር ምስጋና አረጋ እንደተናገሩት፥ የወጪ ንግድ አይኖች የሆኑት የግብርና ምርቶች በህገ ወጦች እየተጋረዱ ነው ።

በተለይም በውጭ ምንዛሬ የኢኮኖሚ ሽንቁሮቿን ለምትደፍን ሀገር ህጋዊ የመሰሉ ላኪዎች የድርጊቱ መሪ ተዋናይ ፤ የኢኮኖሚ አሻጥር ወይም “ሳቦታጅ” ቅርቃር አመቻች ሆነው አርፈዋል።

የሀገርን ጥቅም ማሳጣት ከአሻጥር ውጭ ምን ብያኔ ሊሰጠው ይቻላል የሚሉት ሚኒስትር ዴኤታው፥ ህጋዊ መስመሩን የጣሱ ህጋዊ ሰነዶችንና የመንግስት እውቅና ግን እንደመጠቀሚያ ያደረጉት አካላት በአስገዳጅነት በሚኒስቴሮች ምክር በምርት ገበያ ብቻ ግብይታቸው የሚፈጸሙ ምርቶችን በኮንትሮባንድ እየሸጡ ሀገርን የውጭ ምንዛሬ የማሳጣትን ይዘዋል ይላሉ ።

እናም የሀገር ውስጥ ንግድ ላይ እንደሚደረገው ጥብቅ ቁጥጥርና ክትትል ፤ የላኪዎች አፈጻጸም ፤የሚላከው ምርት ሂደት ገቢና ወጪያቸው ፤ያለፉት አመታት ስኬትና ውድቀታቸውን በቅርብ የሚከታተል ስርአት መፍጠርና ማጥበቅ ፤ ህግን በመጠበቅ ይገባልም ነው የሚሉት ።

የንግድ እና ኢንዱስትሪ ሚኒስቴርም የውጭ ንግዱ ላይ የተጋረጠውን አደጋ ማለፊያ የሀገር ጥቅምን ማስጠበቂያ አዲስ ስርዓትን ተግባራዊ ለማድረግ ዝግጅት አጠናቋል ።

ሚኒሰትር ዴኤታው አምባሳደር ምስጋና አረጋ በዚህ ህገ ወጥ ድርጊት ላይ የተሰማሩ አካላት ፍቃድ እስከመሰረዝ የደረሰ እርምጃን ለመውሰድ ከጥቅምት 1 ቀን 2012 ጀምሮ የላኪዎች ፍቃድ ኦዲት እና የኮንትራት አስተዳደር ስርአት ይዘረጋል ብለዋል።

የአስተዳደር ስርአቱ የውጭ ንግዱን ከተዳከመበት ለማነቃቃት እና የህገ ወጦችን አሻጥር ካሉት ውሽቆች ውስጥ ህጋዊ እርምጃን የሚያከናወንባቸው ነው ብለዋል ።

የጉምሩክ ኮሚሽን ኮሚሽነር ደበሌ ቃበታ ለፋና ብሮድካስቲንግ ኮርፖሬት እንዳሉት፥ በገቢና በወጪ ኮንትሮባንድ እቃዎች ቁጥጥር ተጠናክሮ ቀጥሏል ።

በ2011 በጀት ዓመት 334 ሚሊየን ብር የወጪ ንግድ ኮንትባንድ በጉሙሩክ ኮሚሽን በቁጥጥር ስር መዋሉን እና  አዲሱ በጀት ከተጀመረ ባለፉት 2 ወራት  ተመናቸው 45 ሚሊየን ብር የሚያወጡ የውጭ ንግድ ምርቶች መያዛቸውንም አስታውቀዋል።

ኮሚሸነር ደበሌ ቃበታም አክለውም፥ በተለይም በድንበር ከተሞች መጋዘኖችን በመገንባት የውጭ ንግድ ምርቶችን የሚደብቁ ፤ ሀሰተኛ ሰነዶችን በማቅረብ የጉምሩክ ተቆጣጣሪዎችን የሚያስቱት ላይ እርምጃን የሚያሰከትል ቁጥጥር ይቀጥላል ነው ያሉት።

የኮንትራት አስተዳደሩ ለበርካታ አመታት በአስመጪና ላኪ ስም ውጤታማ መሆን ያልቻሉትንም አሰራሩን ከተከተሉት ወደ ዳር የሚለያቸው ይሆናል ተብሎ ይጠበቃል ።

በሀይለኢየሱስ መኮንን

 

You might also like
Comments
Loading...