Fana: At a Speed of Life!

በኢትዮጵያ የተገነባው የፀሀይ ኃይል ማመንጫ ፕሮጀክት አገልግሎት መስጠት ጀመረ

አዲስ አበባ፣ መስከረም 10፣ 2012 (ኤፍ.ቢ.ሲ) በኦሮሚያ ክልል ፊኒፊኔ ዙሪያ ልዩ ዞን አቃቂ ወረዳ ቆፍቱ ቀበሌ የተገነባው የፀሀይ (ሶላር) ኃይል ማመንጫ ፕሮጀክት አገልግሎት መስጠት ጀመረ።

የፀሀይ ኃይል ማመንጫ ፕሮጀክቱ በትናንትናው ዕለት መስከረም 9 ቀን 2012 ዓ.ም ነው ተመርቆ አገልግሎት መስጠት የጀመረው።

በምርቃቱ ላይ የውሃ፣ መስኖና እና ኢነርጂ ሚኒስቴር ሚኒስትር ዴኤታ ዶክተር ፍሬህይወት ወልደሃና፣ የኢትዮጵያ ኤሌክትሪክ አገልግሎት ዋና ስራ አስፈፃሚ አቶ ሽፈራው ተሊላ፣ የተቋሙ ከፍተኛ የስራ ኃላፊዎችና ከደቡብ ኮሪያ ዎአም ፕሮጀክት የሚወከሉ ከፍተኛ የስራ ኃላፊዎች እንዲሁም የአካባቢው ነዋሪዎች በተገኙበት ተመርቋል፡፡

ፕሮጀክቱ በደቡብ ኮሪያው የኢኮኖሚክ ዲቨሎምንት ኮኦፕሬሽን ፈንድ በተገኝ የገንዘብ ድጋፍ 3 ሚሊየን የአሜሪካ ዶላር እንዲሁም ለመስመር ዝርጋታ፣ ለቆጣሪ ገጠማ እና ለሌሎች መሰል ስራዎች 3 ነጥብ 9 ሚሊዮን ብር ወጭ ተደርጎበታል።

የሶላር ኃይል የማመንጨት አቅምው 250 ኪሎ ዋት ሲሆን፤ ሁለት የሃይል ማመንጫ ጣቢያዎችም ያሉት መሆኑን የኢትዮጵያ ኤሌክትሪክ አገልግሎት አስታውቋል።

የጣቢው የመጀመሪያ ክፍል 630 የሶላር ፓኔሎችን በመጠቀም እስከ 200 ኪሎ ዋት ኤሌክትሪክ ሃይል የሚያመነጭ ሲሆን፥ ሁለተኛው የሃይል ማመንጫ ጣቢያ ደግሞ 162 የሶላር ፓኔሎችን በመጠቀም 50 ኪሎ ዋት ኤሌክትሪክ ሃይል የማመንጨት አቅም አለው።

በሃይል ማመንጫ ጣቢያው የሃይል እጥረት ቢያጋጥም ፈጣን ምላሽ ለመስጠት የሚችል ተጠባባቂ አውቶማቲክ ጀኔረተር እና 334 የባትሪ ሴሎችን በመጠቀም እስከ 30 ኪሎ ዋት ሃይል ማቅረብ እንደሚያስችልም ተገልጿል።

ፕሮጀክቱ 1 ነጥብ 4 ኪሎ ሜትር የሚሸፍን የመካከለኛ መስመርና 8 ኪሎ ሜትር የሚሸፍን የዝቅተኛ መስመር ዝርጋት የተከናወነ ሲሆን፥ አንድ ባለ 100 እና ባለ 200 ኬቪኤ ትራንስፎርመሮች በስራ ላይ እንዲውል መደረጉን ታውቋል።

በፕሮጀክቱ 157 የነጠላ ፌዝ እና 4 ባለ ሶስት ፌዝ በድምሩ 161 ደንበኞች የኤሌክትሪክ ተጠቃሚ ማድረግ መቻሉንም ነው የኢትዮጵያ ኤሌክትሪክ አገልግሎት ያስታወቀው።

You might also like
Comments
Loading...