Fana: At a Speed of Life!

በመዲናዋ ከ190 ሺህ በላይ ዶላርና ከ729 ሺህ በላይ ብር ከነተጠርጣሪዎቹ በቁጥጥር ስር ዋለ

አዲስ አበባ፣ ጳጉሜን 5፣ 2011 (ኤፍ.ቢ.ሲ) የአዲስ አበባ ፖሊስ ኮሚሽን ሠው ሰራሽ የዋጋ ግሽበትንና ህገ ወጥ የውጪ ሀገራት ገንዘብ ምንዛሬን ለመከላከል ከብሔራዊ መረጃና ደህንነት አገልግሎት፣ ከከተማው ንግድና ኢንዱስትሪ ቢሮና ከሌሎች የፀጥታ አካላት ጋር በመቀናጀት እርምጃ መውሰዱን አስታውቋል።

ጳጉሜን 3 እና 4 2011 ዓ.ም በተወሰደው እርምጃ በርካታ ገንዘቦችና የፍጆታ ዕቃዎች በቁጥጥር ማዋሉንም ነው ኮሚሽኑ በዛሬው እለት ባወጣው መግለጫ ያስታወቀው።

በዚህም በቂርቆስ ክፍለ ከተማ ወረዳ 7 በተለምዶ ቀይ መስቀል አካባቢ በግለሠቦች ቤት እና በተሸከርካሪ ውስጥ ጭምር በህገ ወጥ መንገድ የሚከናወኑ የውጪ ሀገራት ገንዘቦችን ይመነዝራሉ በተባሉ ግለሰቦች ላይ በተደረገው ክትትል ከ190 ሺህ በላይ የአሜሪካ ዶላር፣ 2 ሺህ 100 ዩሮ እና ከ729 ሺ በላይ የኢትዮጵያ ብር ከነተጠርጣሪዎቹ በቁጥጥር ስር መዋላቸውን ኮሚሽኑ አስታውቋል።

በሸቀጦች ላይ የዋጋ ግሽበት እንዲከሰት በሚያደርጉ ግለሠቦች መጋዘን ላይ በተደረገው ድንገተኛ ቁጥጥርም 198 ኩንታል ቡና፣ 21 ኩንታል ዱቄት 205 ኩንታል በርበሬ እና በርካታ ጀሪካን የፓልም ዘይት ተከማችተው ተገኝተዋል።

በተጨማሪም 100 የንግድ ተቋማት ፈቃድ ሳይኖራቸው የዋጋ ጭማሪ በማድረግ ሲሸጡ ተገኝተው እንዲታሸጉና ስምንት የንግድ ቤቶች ማስጠንቀቂያ እንዲሰጣቸው መደረጉን ኮሚሽኑ አስታውቋል።

እንደዚህ አይነት ወንጀሎች የሀገርን ኢኮኖሚ የሚጎዱና የህብረተሰቡን የዕለት ተዕለት ኑሮን የሚያቃውሱ በመሆኑ ወንጀሎቹን ለመከላከል ህብረተሰቡ ከፖሊስ ጋር ተባብሮ የመስራት እና ጥቆማ የመስጠት ልምዱን አጠናክሮ እንዲቀጥል ኮሚሽኑ መልዕክቱን አስተላልፏል።

You might also like
Comments
Loading...