Fana: At a Speed of Life!

በመንግስትና በግሉ ዘርፍ አጋርነት በ300 ሚሊየን ዶላር 2 የፀሃይ ሃይል ማመንጫ ፕሮጀክቶች ሊገነቡ ነው

አዲስ አበባ፣ ጳጉሜን 6፣ 2011 (ኤፍ.ቢ.ሲ) በ2012 በጀት ዓመት በመንግስትና በግሉ ዘርፍ አጋርነት በ300 ሚሊየን የአሜሪካ ዶላር ወጪ ሁለት የፀሃይ ሃይል ማመንጫ ፕሮጀክቶች እንደሚገነቡ የገንዘብ ሚኒስቴር አስታወቀ።

ኢትዮጵያ በመንግስትና በግሉ ዘርፍ አጋርነት17 ፕሮጀክቶች ለመገንባት ጥረት እያደረገች ሲሆን፥ ከእነዚህ ውስጥም 13ቱ የሃይል ማመንጫዎች መሆናቸው ተገልጿል።

ከ13ቱ የሃይል ማመንጫ ፕሮጀክቶች ውስጥ ስምንቱ ከፀሃይ ሃይል ኤሌክትሪክ የሚያመነጩ ሲሆን፥ አምስቱ ደግሞ ከውሃ የኤሌክትሪክ ሃይል የሚያመነጩ ናቸው።

የገንዘብ ሚኒስትር ዲኤታ ዶክተር ተሾመ ታፈሰ በዛሬው ዕለት በሰጡት መግለጫ ከስምንቱ የፀሃይ ሃይል ኤሌክትሪክ ማመንጫ ፕሮጀክቶች ውስጥ ሁለቱ በአፋርና ሶማሌ ክልሎች በሚገኙት ዲቼቶና ጋድ ተብለው በሚጠሩ አካባቢዎች ይገነባሉ።

ፕሮጀክቶቹ እያንዳንዳቸው 125 ሜጋ ዋት የኤለክትሪክ ሃይል የማመንጫት አቅም ያላቸው መሆኑም ነው የተገለጸው።

የፕሮጀክቶቹ ግንባታ አኳ ፓወር በተሰኘ ዓለም አቀፍ ተቋራጭ አማካኝነት የሚከናወን ሲሆን፥ ለዚህም 300 ሚሊየን የአሜሪካ ዶላር ወጪ ይደረጋል ተብሏል።

የፕሮጀክቶቹ የግንባታ ሂደት በ18 ወራት ጊዜ ውስጥ ተጠናቆ ሃይል የሚያቀርቡ መሆኑም በመግለጫው ተመላክቷል።

አኳ ፓወር ከፕሮጀክቱ የሚያመርተውን የኤሌክትሪክ ሃይል ለመንግስት በ2 ነጥብ 5260 የአሜሪካ ሳንቲም በኪሎ ዋት ፐር ሃወር ለሽያጭ የሚያቀርብ ይሆናል።

ይህም በአፍሪካ ዝቅተኛ የኤሌክትሪክ ሽያጭ ዋጋ መሆኑን የገንዘብ ሚኒስቴር አስታውቋል።

በተመሳሳይ በቅርቡ ስድስት የፀሃይ ሃይል ማመንጫ ፕሮጀክቶች የጨረታ ሂደታቸው ሲጠናቀቅ ይፋ የሚደረግ መሆኑ ተገልጿል።

በሙሃመድ አሊ

You might also like
Comments
Loading...