Fana: At a Speed of Life!

ሶስት የከፍተኛ ደረጃ የማዕድን ማምረት ፈቃድ ተሰጠ

አዲስ አበባ ፣ መስከረም 7 ፣ 2012 (ኤፍ ቢ ሲ) የማዕድን እና ነዳጅ ሚኒስቴር ሶስት የከፍተኛ ደረጃ የማዕድን ማምረት ፈቃድ መስጠቱን አስታወቀ።

ሚኒስቴሩ የማዕድን ፍለጋ ለማካሄድ ፈቃድ ለጠየቀውና የፈቃድ መውሰጃ መስፈርቶችን አሟልቶ ለቀረበው አባይ ኢንዱስትሪ ልማት አክሲዮን ማኅበር ነው ፈቃዱን የሰጠው።

ስምምነቱን የማዕድንና ነዳጅ ሚኒስትሩ ዶክተር ሳሙኤል ኡርቃቶ እና የአባይ ኢንዱስትሪ ልማት አክሲዮን ማኅበር ዋና ሥራ አስፈጻሚ አቶ ደምስ ተሻገር ተፈራርመዋል።

ኩባንያው ፈቃድ ያገኘው በአማራ ብሄራዊ ክልላዊ መንግስት የተለያዩ አካባቢዎች ሲሆን፥ የከፍተኛ ደረጃ ሸክላ አፈር፣ የከፍተኛ ደረጃ ላይም ስቶን ማዕድን እንዲሁም የከፍተኛ ደረጃ የጅፕሰም ማዕድን ያመርታል።

ለዚህ ስራውም 140 ሚሊየን 712 ሺህ 881 ብር ብር የመደበ ሲሆን፥ በምርት ወቅት በድምሩ ለ114 ኢትዮጵያውያን የስራ ዕድል እንደሚፈጥር ከማዕድንና ነዳጅ ሚኒስቴር ያገኘነው መረጃ ያመላክታል።

ኩባንያው የአካባቢውን ማህበረሰብ ጤንነትና ደህንነት በማይጎዳና ብክለት በማያስከትል መልኩ የምርት ስራውን ለማከናወን ውል የፈፀመ ሲሆን፥ ሥራውን ሲያቋርጥም በአካባቢ፣ በሰው ህይወትና ንብረት እንዲሁም ዕፅዋት ላይ ጉዳት ሊያስከትሉ የሚችሉ ማናቸውንም ቅሪቶችና ግንባታዎችን ለማስወገድ ተስማምቷል።

ሚኒስቴሩ ኢትዮጵያ ለያዘችውና ወደ ኢንዱስትሪ መር ኢኮኖሚ ለመሸጋገር ለምታደርገው ጥረት መሳካት ዘርፉ የሚፈልገውን የማዕድን ግብዓት ለሟሟላት እየሰራ መሆኑን ገልጿል።

የሃገር ውስጥ ባለሃብቶች በዘርፉ እንዲሰማሩ ከፍተኛ ጥረት እያደረገ ሲሆን፥ ፍላጎቱ ያላቸው ኢትዮጵያውያንና ትውልደ ኢትዮጵያውያን መዋዕለ ነዋያቸውን እንዲያፈሱም ጥሪውን አቅርቧል።

 

 

You might also like
Comments
Loading...