Fana: At a Speed of Life!

ሳዑዲ ዓረቢያ አሜሪካ መራሹን ዓለም አቀፍ የባህር ሃይል ጥምረት ልትቀላቀል ነው

አዲስ አበባ ፣ መስከረም 7 ፣ 2012 (ኤፍ ቢ ሲ) ሳዑዲ ዓረቢያ በባህረ ሰላጤው የባህር ክልል የመርከቦችን ደህንነት ለመጠበቅ የተመሰረተውን ዓለም አቀፍ የባህር ሃይል ጥምረት ልትቀላቀል ነው።

በአሜሪካ የሚመራው ጥምረት በተለይም በባህረ ሰላጤው የባህር ክልል የሚንቀሳቀሱ የንግድ መርከቦችን ደህንነት ለመጠበቅ የሚሰራ ነው ተብሏል።

አውስትራሊያ፣ ብሪታንያ እና ባህሬን ጥምረቱን የተቀላቀሉ ሲሆን፥ ሳዑዲ ዓረቢያም በሳምንቱ መጨረሻ በነዳጅ ማጣሪያዎቿ ላይ የተፈጸመውን ጥቃት ተከትሎ ጥምረቱን እንደምትቀላቀል ይፋ አድርጋለች።

ጥምረቱ በሆርሙዝ የባህር ሰርጥ በነዳጅ ጫኝ መርከቦች ላይ የተፈጸመውን እገታና ጥቃት ተከትሎ በአሜሪካ ጠንሳሽነት የተመሰረተ ነው።

ከአሜሪካ የጥምረቱን ተቀላቀሉ ጥሪ በኋላም ኢራን፥ በባህረ ሰላጤው የባህር ክልል የሚኖር የውጭ ሃገራት ወታደራዊ እንቅስቃሴ የአካባቢውን ሰላም ያደፈርሰዋል በሚል ማስጠንቀቋ ይታወሳል።

በወቅቱም ለዚህ መሰሉ አካሄድ አፀፋዊ እርምጃ እወስዳለሁ ስትልም ተደምጣለች።

በሳምንቱ መጨረሻ የተፈጸመውን ጥቃት ተከትሎ የዓለም ነዳጅ ዋጋ ሲያሽቆለቁል፥ የሳዑዲ የቀን የነዳጅ ድፍድፍ ምርትም በ5 ነጥብ 7 ሚሊየን በርሜል እንዲቀንስ ቀንሷል።

ሳዑዲ የምርት መጠኑ ወደነበረበት ይመለሳል ስትል፥ በዘርፉ የተሰማሩ ኩባንያዎች ግን ጥቃቱን ተከትሎ በቀጠናው ውጥረት ይነግሳል በሚል ፍራቻቸውን እየገለጹ ነው።

ለጥቃቱ በኢራን የሚደገፉት የሃውቲ አማጽያን ሃላፊነቱን ቢወስዱም፥ አሜሪካ ግን ጣቷን ቴህራን ላይ ቀስራለች።

የውጭ ጉዳይ ሚኒስትሩ ማይክ ፖምፒዮም ኢራን ከጥቃቱ ጀርባ አለችበት በሚል የሃውቲዎችን መግለጫ አጣጥለውታል፤ ሚኒስትሩ ኢራንን ሲወነጅሉ ምክንያትም ሆነ ማስረጃ አልጠቀሱም።

ቴህራን በበኩሏ የአሜሪካን ውንጀላ መሰረተ ቢስ በሚል አጣጥላዋለች።

የሃውቲ አማጽያን በበኩላቸው በሪያድ ላይ መጠነ ሰፊ ጥቃት ልንፈጽም እንችላለን በሚል ዛቻ አዘል መልዕክት አስተላልፈዋል።

 

 

ምንጭ፦ አልጀዚራ

You might also like
Comments
Loading...