Fana: At a Speed of Life!

ሩዋንዳ በሊቢያ እስር ቤት የሚገኙ የአፍሪካ ስደተኞችን ለመቀበል ተስማማች

አዲስ አበባ፣ ጳጉሜን 6፣ 2011 (ኤፍ.ቢ.ሲ) ሩዋንዳ በሊቢያ እስር ቤት የሚገኙ የአፍሪካ ስደተኞችን ወደ ሀገሯ እንዲገቡ ፈቅዳለች።

የሩዋንዳ መንግሥት፣ የተባበሩት መንግሥታት ስደተኞች ኤጀንሲ እና አፍሪካ ሕብረት በትናንትናው ዕለት ስምምነት ላይ መድረሳቸውን ይፋ አድርገዋል።

በስምምነቱ መሰረትም የመጀመሪያዎቹ 500 ሰዎች በሚቀጥሉት ሳምንታት ውስጥ በአውሮፕላን ወደ ሩዋንዳ የሚጓዙ ይሆናል።

ስደተኞቹ አብዛኛዎቹ የአፍሪካ ቀንድ  ሀገራት ተወላጆች መሆናቸው የተነገረ ሲሆን፥ በሊቢያ በኩል አውሮፓ ለመግባት ጉዞ የጀመሩ መሆናቸው ታውቋል።

ከተመላሾች ውስጥም ከሶማሊያ፣ ኤርትራና ሱዳን ሀገራት የመጡ ስደተኞች መኖራቸው በዘገባው ተመላክቷል።

ስደተኞቹ ሩዋንዳ ከመጡ በኋላ ከፊሎቹ በሶስተኛ አገር እንዲሰፍሩና ገሚሶቹ ጥገኝነት ወደ ሰጣቸው አገር እንዲሄዱ የሚደረግ ሲሆን ቀሪዎቹ ደግሞ ለደህንነታቸው የማያሰጋ ከሆነ ወደየአገራቸው እንዲመለሱ እንደሚደረግ ተገልጿል፡፡

ስደተኞች ሩዋንዳ ከደረሱ በኋላም የተባበሩት መንግሥታት አማራጮችን የሚፈልግላቸው መሆኑ ተመላክቷል።

በዚህ መሰረትም አንዳንዶች ወደ ሶስተኛ ሀገር ሄደው እንዲኖሩ ሊደረግ ይችላል፤ አንዳንዶቹ ደግሞ ከዚህ ቀደም ጥገኝነት ጠይቀው ወዳገኙበት ሀገር ይመለሳሉ አሊያም ሀገራቸው ሰላም ከሆነ ወደዚያው ሊመለሱ ይችላሉ ተብሏል።

ምንጭ፦ ቢቢሲ

You might also like
Comments
Loading...