Fana: At a Speed of Life!

ለአዲስ አበባው ኢሬቻ 4 ሺህ ሜትር የሚረዝም ጩኮ እየተዘጋጀ ነው

አዲስ አበባ፣ መስከረም 12፣ 2012(ኤፍ.ቢ.ሲ) በአዲስ አበባ ከተማ መስከረም 24 2012 በሚከበረው የኢሬቻ በዓል ላይ የሚቀርብ 4 ሺህ ሜትር የሚረዝም ጩኮ እየተዘጋጀ መሆኑ ታውቋል።

የባህል ምግቦች ውስጥ አንዱ የሆነው ጩኮ እንግዳ ለመቀበል፣ በሰርግ ጊዜ እና በበዓላት ወቅት በብዛት ከሚዘጋጁት እና ከሚዘወተሩ የምግብ አይነቶች ውስጥ አንዱ ነው።

ታዲያ ዘንድሮ በአዲስ አበባ በሚከበረው የሆራ ፊንፊኔ ኢሬቻ ላይ ይህንን ባህላዊ ምግብ ለየት ባለ መልኩ በማቅረብ በዓለም የድንቃ ድንቅ እና ክብረ ወሰኖች መዝገብ ላይ ለመስፈር ዝግጅት እየተደረገ ይገኛል።

በአዲስ አበባው የኢሬቻ በዓል ላይ የሚቀርበውን ጩኮ ምን ልዩ ያደርገዋል ካላችሁ ደግሞ፥ እየተዘጋጀ ያለው ጩኮ 4 ሺህ ሜትር ወይም 4 ኪሎ ሜትር ርዝመት ያለው መሆኑ ነው።

ጩኮውን በማዘጋጀት ላይ ያሉ ሰዎች ለፋና ብሮድካስቲንግ ኮርፖሬት እንደተናገሩት፥ በየእለቱ ከ300 ሜትር በላይ ጩኮ በመዘጋጀት ላይ ይገኛል።

ለጩኮው ዝግጅትም 3 ሺህ ኪሎ ግራም ቅቤ እና 22 ኩንታል የገብስ ዱቄት ጥቅም ላይ እየዋለ ነው ያሉ ሲሆን፥ በ10 ኪሎ ግራም የገብስ ዱቄት ላይም 7 ኪሎ ግራም ቅቤ በመጨመር እየተዘጋጀ መሆኑንም አስታውቀዋል።

እየተዘጋጀ ያለው ጩኮ ከእጅ ንክኪ የፀዳ እንዲሆን ከተዘጋጀ በኋላ በፕላስቲክ እየታሸገ እንዲቀመጥ እየተደረገ መሆኑም ተነግሯል።

የፊታችን መስከረም 24 2012 በአዲስ አበባ በሚከበረው የኢሬቻ በዓል ላይ ለሚካፈሉ ለእያንዳንዱ ሰዎችም ከ37 እስከ 39 ግራም ጭኮ እንዲደርሳቸው ይደረጋልም ብለዋል አዘጋጆቹ።

You might also like
Comments
Loading...