Fana: At a Speed of Life!

ሀገር አቀፍ የአጠቃላይ ትምህርት ስርዓተ ትምህርት የማጠቃለያ ጥናት ጉባኤ እየተካሄደ ነው

አዲስ አበባ፣ ነሃሴ 29፣ 2011 (ኤፍ.ቢ.ሲ) የኢትዮጵያ አጠቃላይ ትምህርት ስርዓተ ትምህርት የማጠቃለያ ጥናት ጉባኤ እየተካሄደ ነው፡፡

ለሁለት ቀናት የሚካሄደው ይህ ጉባኤ አጠቃላይ የሀገሪቱን ስርዓተ ትምህርት ለማሻሻል እየተሰራ የሚገኘውን ስራ የሚያሳይ መሆኑን የትምህርት ሚኒስትር ዴኤታ ወይዘሮ ፂዮን ተክሉ ተናግረዋል፡፡

ሚኒስትር ዴኤታዋ የስርዓተ ትምህርቱ ጥናት ነፃ እና ገለልተኛ በሆነ አካል እየተካሄደ እንደሚገኝም ነው የገለፁት፡፡

በዚህም አዳዲስ ሀሳቦች እንደተገኙበት የተገለጸ ሲሆን ፥ጥናቱን ሲያካሂድ የቆየው ቡድን የደረሰበትን ስራ እንደሚያቀርብ ይጠበቃል፡፡

ይህ የስርዓተ ትምህርት በቅርቡ ይፋ የሆነው የትምህርትና ስልጠና ፍኖተ ካርታ ውስጥ ከተካተቱ ጉዳዮች አንዱ መሆኑ ነው የተነገረው፡፡

ጥናቱ በቀጣይ ተግባራዊ ለሚሆነው የተሻሻለ ስርዓተ ትምህርት ግብዓቶችን ለመሰብሰብ እንደሚያግዝ ሚኒስትር ዴኤታዋ ገልፀዋል፡፡

ባለፈው አንድ ዓመት በተካሄደው ጥናት በ2001 ዓ.ም የተከለሰው አጠቃላይ ስርዓተ ትምህርት ጥንካሬ እና ድክመት የፈተሸ መሆኑንም ጠቁመዋል፡፡

አዲሱ የስርዓተ ትምህርት ዝግጅት በተባበሩት መንግሥታት የህፃናት መርጃ ድርጅት ድጋፍ እየተደረገለት ይገኛል፡፡

የስርዓተ ትምህርት ጥናቱ ለሶስት ዓመታት የሚካሄድ ሲሆን አሁን ላይ የአንድ ዓመቱ ጥናት ተጠናቋል፡፡

በአወል አበራ

You might also like
Comments
Loading...