Fana: At a Speed of Life!

ፕሬዚዳንት ትራምፕ በተወሰኑ የቻይና ምርቶች ላይ የጣሉትን ቀረጥ ለተወሰነ ጊዜ አራዘሙት

አዲስ አበባ ፣ ነሃሴ 8 ፣ 2011 (ኤፍ ቢ ሲ) የአሜሪካው ፕሬዚዳንት ዶናልድ ትራምፕ በተወሰኑ የቻይና ምርቶች ላይ የጣሉትን ቀረጥ ለተወሰነ ጊዜ አራዘሙት።

ፕሬዚዳንቱ ቻይና ወደ አሜሪካ በምታስገባቸው የተወሰኑ ምርቶች ላይ ከመጭው የፈረንጆቹ መስከረም 1 ጀምሮ ለመጣል ያቀዱትን ቀረጥ ለተወሰነ ጊዜ ማራዘማቸውን አስታውቀዋል።

በዚህም ተንቀሳቃሽ ስልኮች፣ ቪዲዮ ማጫወቻወች፣ ላፕቶፕ፣ የህጻናት መጫዎቻዎችን ጨምሮ የፍጆታ ምርቶች ላይ ሊጣል የነበረው ቀረጥ እስከ ቀጣዩ ታህሳስ ወር ድረስ የሚዘገይ ይሆናል።

ይህም አሜሪካውያን ሸማቾችን በበዓል ሰሞን በዋጋ ንረት ላለመጉዳት ያለመ ነው ተብሏል።

ዶናልድ ትራምፕ ሃገራቸው ከቻይና ጋር የገባችውን የንግድ ፍጥጫ ተከትሎ 300 ቢሊየን ዶላር ዋጋ ባላቸውና ወደ አሜሪካ በሚገቡ የቻይና ምርቶች ላይ ከመስከረም 1 ቀን ጀምሮ 10 በመቶ ቀረጥ ለመጣል አቅደዋል።

አሁን ተራዝሟል የተባለው ቀረጥም ከዚህ እቅድ ውስጥ ግማሽ ያክሉን ይሸፍናል ነው የተባለው።

የአሁኑ የትራምፕ ውሳኔ በሸማቾች ላይ ሊከሰት ይችል የነበረን የዋጋ ንረት ከመቀነሱም ባሻገር በሃገራቱ ፍጥጫ እየተጎዳ ያለውን የአክሲዮን ገበያ ለማረጋጋት እንደሚጠቅምም ታምኖበታል።

ዋሽንግተን እና ቤጂንግ የንግድ ፍጥጫ ውስጥ የገቡ ሲሆን፥ አንዳቸው በአንዳቸው ምርቶች ላይ ተጨማሪ ቀረጥ መጣላቸው ይታወሳል።

ልዩነታቸውን ለመፍታትም በከፍተኛ የስራ ሃላፊዎቻቸው አማካኝነት ድርድር ቢያደርጉም እስካሁን መግባባት ላይ መድረስ አልቻሉም።

የአሁኑ የትራምፕ ውሳኔም ከተጠቀሱት ምርቶችና የፍጆታ እቃዎች ውጭ ሌሎች የቻይና ምርቶችን አይመለከትም።

 

 

ምንጭ፦ ሬውተርስ

 

You might also like
Comments
Loading...