Fana: At a Speed of Life!

ጠ/ሚ ዶ/ር አብይ በግንባታ ላይ የሚገኘውንና በሰዓት 80 ሺህ ዳቦ የሚያመርተውን የዳቦ ፋብሪካ ጎበኙ

አዲስ አበባ፣ ነሃሴ 5፣ 2011 (ኤፍ.ቢ.ሲ) ጠቅላይ ሚኒስትር ዶክተር አብይ በግንባታ ላይ የሚገኘውንና በሰዓት 80 ሺህ ዳቦ ያመርታል ተብሎ የሚጠበቀውን የዳቦ ፋብሪካ ጎበኙ ፡፡

የአዲስ አበባ ከተማ የነዋሪዎችን የዳቦ ችግር መቅረፍ ያስችላል የተባለው የዳቦ ፋብሪካ ግንባታ ለማስጀመር በግንቦት ወር መጨረሻ የአዲስ አበባ ከተማ አስተዳድር ምክትል ከንቲባ ኢንጅነር ታከለ ኡማ የመሰረት ድንጋይ ማኖራቸው የሚታወስ ነው፡፡

በዛሬው ጉብኝትም የኢንቨስትመንት ኮሚሺን ኮሚሽነር አበበ አበባየሁ ፣ ኢንጅነር ታከለ ኡማ እና ሌሎች የስራ ሃላፊዎች ተገኝተዋል፡፡

ፋብሪካው እየተገነባ የሚገነው በሜድሮክ ኢትዮጵያ ግሩፕ አባል በሆነው ሆራይዘን ፕላንቴሽን በተሰኘው ኩባንያ መሆኑ ተገልጿል።

የፋብሪካው የግንባታ ስራ በስድስት ወራት ውስጥ ይጠናቃል ተብሎ የሚጠበቅ ሲሆን ፥ለበርካታ የአከባቢው ወጣቶች የስራ ዕድል የሚፈጥር መሆኑም ተገልጿል።

ፋብሪካው በመጀመሪያ ዙር ግንባታ በሰዓት 80 ሺህ ዳቦ ያመርታል ተብሎ ይጠበቃል።

የሚመረተው ዳቦም “ሸገር ዳቦ” ተብሎ እንዲጠራ ስያሜ ተሰጥቶታል።

በተያያዘ ጠቅላይ ሚኒስተር ዶክተር አብይ አህመድ እና የአዲስ አበባ ከተማ አስተዳደር ምክትል ከንቲባ ኢንጂነር ታከለ ኡማ እቴጌ መነን ትምርት ቤት በመገኘት እድሳቱን ጎብኝተዋል።

 

ጠቅላይ ሚኒስተር ዶክተር አብይ አህመድና ኢንጂነር ታከለ ኡማ በ2012 የትምህርት ዘመን የአዳሪ ትምህርት ቤት ከሚሆኑት ሁለቱ የመንግስት ትምህርት ቤቶች አንደኛው በሆነው የእቴጌ መነን ትምህርት ቤት በመገኘት እድሳቱ ያለበትን ሁኔታ መመልከታቸውን የከንቲባ ጽህፈት ቤት አስታውቋል።

የእቴጌ መነን ትምህርት ቤት በ2012 የትምህርት ዘመን 500 ሴት ተማሪዎችን ተቀብሎ በአዳሪ ፕሮግራም ለማስተማር ቅድመ ዝግጅት እያደረገ እንደሚገኝ ይታወቃል።

በአላዛር ታደለ

You might also like
Comments
Loading...