Fana: At a Speed of Life!

ያለእድሜ ጋብቻና የሴት ልጅ ግርዛትን ለማስቆም የተዘጋጀ የ5 ዓመት ፍኖተ ካርታ ይፋ ሆነ

አዲስ አበባ፣ ነሃሴ 8፣ 2011 (ኤፍ.ቢ.ሲ) በሚቀጥሉት አምስት ዓመታት በኢትዮጵያ ያለእድሜ ጋብቻ እና የሴት ልጅ ግርዛትን ለማስቆም የተዘጋጀ ብሄራዊ ፍኖተ ካርታ ይፋ ሆነ።

በስነ ስርዓቱ ላይ የኢፌዴሪ ፕሬዚዳንት ሳህለወርቅ ዘውዴ እና የኢፌዴሪ የሴቶች፣ ህፃናትና ወጣቶች ሚኒስትር ወይዘሮ ያለም ፀጋይ እና በኢትዮጵያ የተባበሩት መንግስታት ድርጅት የህጻናት መርጃ ድርጅት (ዩኒሴፍ) ተወካይ አዴሌ ኮድር ተገኝተዋል።

ፍኖተ ካርታውን የኢፌዴሪ ፕሬዚዳንት ሳህለወርቅ ዘውዴ ይፋ አድርገውታል።

ፕሬዚዳንቷ ፍኖተ ካርታውን ተግባራዊ ለማድረግ ያለሰለሰ ጥረት ማድረግ እንደሚገባ ገልጸዋል።

የኢፌዴሪ የሴቶች፣ ህፃናትና ወጣቶች ሚኒስትር ወይዘሮ ያለም ፀጋይ ፍኖተ ካርታው መንግስት የሴት ልጅ ግርዛትና ያለ እድሜ ጋብቻን ለማስቆም የሚያደርገውን ጥረት እንደሚያግዝ ተናግረዋል።

በኢትዮጵያ የዩኒሴፍ ተወካይ አዴሌ ኮድር በበኩላቸው፥ የኢትዮጵያ መንግስት የሴት ልጅ ግርዛትን እና ያለ እድሜ ጋብቻን በፈረንጆቹ 2025 ለማስቆም አቅዶ እየተንቀሳቀሰ መሆኑን አንስተዋል።

ይህን ተግባራዊ ለማድረግም ባለ ድርሻ አካላትን በማሳተፍና እቅዱን ተግባራዊ ለማድረግ በሚያግዝ መልኩ የመደበውን በጀት በእጥፍ በማሳደግ እየሰራ ይገኛልም ነው ያሉት።

እንደ እርሳቸው ገለጻ በኢትዮጵያ ከ10ሩ አራቱ ልጃገረዶች 18ኛ አመት የልደት በዓላቸውን ሳያከብሩ ትዳር ይይዛሉ።

ኢትዮጵያ ዓለም ላይ ያለ እድሜ ጋብቻ ከሚፈጸምባቸው አምስት ሃገራት አንዷ መሆኗን ያነሱት ተወካይዋ፥ በመላ ሃገሪቱ 15 ሚሊየን ሴቶች ያለ እድሜ ትዳር መያዛቸውን አውስተዋል።

በፈረንጆቹ 2030 ያለ እድሜ ጋብቻን ለማስቆምም እየተደረ ያለውን ጥረት በእጥፍ በማሳደግ መንቀሳቀስ ይገባልም ብለዋል።

ለፍኖተ ካርታው ተግባራዊነትና ስኬታማነትም አስፈላጊውን በጀት በመመደብ ክትትል፣ በማድረግና በቅንጅት መስራት እንደሚገባም አጽንኦት ሰጥተዋል።

ፍኖተ ካርታው ከፈረንጆቹ 2020 እስከ 2024 ድረስ የሚተገበር ሲሆን፥ ቁልፍ ስትራቴጂዎችን በመተግበርና የባለ ድርሻ አካላትን ተሳትፎ በማሳደግ ያለ እድሜ ጋብቻን እና የሴት ልጅ ግርዛትን ማስቆም እንደሚያስችል ታምኖበታል።

ዛሬ ይፋ የሆነው ፍኖተ ካርታ የኢፌዴሪ የሴቶች፣ ህፃናትና ወጣቶች ሚኒስቴር ከጤና ሚኒስቴር፣ ከገንዘብ ሚኒስቴር፣ ከሰራተኛና ማህበራዊ ጉዳይ ሚኒስቴር እና ከፌደራል ጠቅላይ አቃቤ ህግ ጋር በቅንጅት የሚተገብረው ነው።

You might also like
Comments
Loading...