Fana: At a Speed of Life!

የፌዴራልና የክልል ከፍተኛ ባለስልጣናት በደቡብ ጎንደር ዞን የጎርፍ አደጋ የደረሰባቸውን አካባቢዎች እየጎበኙ ነው

አዲስ አበባ፣ ነሃሴ 8፣ 2011 (ኤፍ.ቢ.ሲ) የፌዴራልና የአማራ ክልል ከፍተኛ ባለስልጣናት በደቡብ ጎንደር ዞን የጎርፍ አደጋ የደረሰባቸውን አካባቢዎች እየጎበኙ ነው።

በጉብኝቱ የአማራ ክልል ርዕሰ መስተዳደር አቶ ተመስገን ጥሩነህን ጨምሮ የፌዴራል ውሃ መስኖና ኢነርጅ ሚኒስቴር ሚኒስትር ዶክተር ኢንጅነር ስለሽ በቀለ ተገኝተዋል።

ከፍተኛ ባለስላጣናቱ በአሁኑ ወቀት በደቡብ ጎንደር ዞን ፎገራና ሊቦ ከምከም ወረዳዎች በጎርፍ የተጠቁ አካባቢዎች የደረሰውን ጉዳት እየጎበኙ መሆኑን አብመድ ዘግቧል።

የተከሰተው የጎርፍ አደጋ ከርብ ግድብ ጋር የተያያዘ አለመሆኑን የፌዴራል ውሃ መስኖና ኢነርጂ ሚኒስቴር አስታወቋል።

የውኃ መስኖና ኢነርጂ ሚኒስትር ስለሽ በቀለ አደጋው ከርብ የመስኖ ግድብ ጋር የተያያዘ እንዳልሆነና ‹‹የርብ ወንዝ ግድብ ሞልቶ በመፍሰሱ የመጣ ችግር ነው›› እየተባለ የሚነገረው መረጃ ትክክል አለመሆኑን ተናግረዋል።

እንደ ሚኒስትሩ ገለጻ ጎርፉ ከግንቦት ወር ጀምሮ በጣለው ከፍተኛ ዝናብ ምክንያት ከግድቡ በታች ባሉ ተፋሰሶች ያሉ ወንዞች በመሙላት የተፈጠረ ነው።

የርብ ግድብ እስከ ትናንት ድረስ ተዘግቶ በላይኛው ተፋሰሶች የሚመጣውን ውሃ በመሸከም ተጨማሪ ጉዳት እንዳይደርስ ማስቻሉንም ነው ሚኒስትሩ ያስረዱት።

የፎገራ ወረዳ ዋና አስተዳዳሪ አቶ ጀምበሩ ጓዴም ችግሩ የተፈጠረው ከግድቡ በታች ያለው የርብ ግድብ የማፋሰሻ ቦዮች አለመጠናቀቅና የጉማራ ገባር ወንዞች መሙላት ጋር ተያይዞ እንጅ ከርብ መስኖ ግድብ በመጣ ውኃ አለመሆኑን አስታውቀዋል።

የርብ ግድብ ጥቅምት 18 ቀን 2011ዓ.ም የግንባታ ሥራው ተጠናቅቆ መመረቁ ይታወሳል፤ ነገር ግን ከግድቡ ግርጌ የሚሠሩ ለመስኖ ሥራ የሚያስፈልጉ ማፋሰሻዎች አልተጠናቀቁም ነበር።

የአካባቢው አርሶ አደሮች ቦዮቹ ባለመጠናቀቃቸው ውኃው እንዲጨምር እያደረጉ መሆኑን ነው ገልጸዋል።

ችግሩን በዘላቂነት ለመፍታት በላይኛው ተራራማ የተፋሰሱ አካባቢዎ የተፈጥሮ ሀብት ሥራ መሥራትና በጉማራ ወንዝ ላይም የውኃ መከላከያ መሠራት እንዳለበት ነው የተጠቆመው።

ያልተጠናቀቁ ማፋሰሻዎችም ጊዜ ሳይሰጥ መሠራት እንዳለባቸው ተነግሯል።

ከፎገራ ወረዳ አስተዳደር የተገኘው መረጃ እንደሚያመላክተው በወረዳው ስድስት ቀበሌዎች ሙሉ በሙሉ አራት ቀበሌዎች ደግሞ በከፊል ጉዳት ደርሶባቸዋል።

አደጋው ከ78 ሺህ 800 በላይ ሰዎች ዕለታዊ እንቅስቃሴ ላይ ጉዳት ያስከተለ ሲሆን፥ 1ሺህ 849 ሄክታር የሩዝ ሰብልም ወድሟል ነው የተባለው።

ከዚህ ባለፈም 72 ሺህ 800 የሚሆኑ የቤት እንስሳት የመኖ እጥረት የገጠማቸው መሆኑ ተመላክቷል።

የነብስ አድን ሥራውን ለማቀላጠፍ የክልሉ መንግሥት ስድስት ጀልባዎችን እንዳዘጋጀና በአራት ቀበሌዎች ደግሞ ጊዜያዊ መጠለያዎች አዘጋጅቶ የሚያስፈልጉ የምግብ አቅርቦት ሥራዎችን እየሠራ መሆኑም ተጠቁሟል።

You might also like
Comments
Loading...