Fana: At a Speed of Life!

የውጭ ሀገር የስራ ስምሪትን ለማቀላጠፍ የሚያስችል ቴክኖሎጂ ተግባራዊ ሊደረግ ነው

አዲስ አበባ፣ ነሃሴ 14፣ 2011 (ኤፍ.ቢ.ሲ) የውጭ ሀገር ህጋዊ የስራ ስምሪትን ለማቀላጠፍ የሚያስችል ቴክኖሎጂ ተግባራዊ እንደሚያደርግ የሰራተኛ እና ማህበራዊ ጉዳይ ሚኒስቴር ገለፀ።

ሚኒስትር ዴኤታዋ ወይዘሮ መሰለች እሸቴ ከፋና ብሮድካስቲንግ ኮርፖሬት ጋር ባደረጉት ቆይታ፥ ቴክኖሎጂው ከመጪው ዓመት ጀምሮ ተግባራዊ እንደሚደረግ አስታውቀዋል።

ቴክኖሎጂው የፌደራልና የክልል ተቋማትን በመረጃ መረብ በማስተሳሰር  ወደ ውጭ የሚጓዙ ሰራተኞች ከተቋም ወደ ተቋም ሰነድን ለማረጋገጥ የሚያደርጉትን ሂደት በማስቀረት አገልግሎቱን እንዲያገኙ ያስችላል ብለዋል።

በአለም የፍልሰት ድርጅት የገንዘብ ድጋፍ በፊሊፕንሱ ኤልቢቲ ኩባኒያ  በመልማት ላይ ያለው “ኢትዮ ማይግራንት ዳታ ቤዝ” በሀሰተኛ ስነድ ወደ ውጭ ሀገር ለስራ ለመሰማራት የሚደረግ ጥረትን በማስቆም የመረጃ ልውውጥን ወጥና ጥራቱ የተጠበቀ እንዲሆን ያደርጋል።

ሚኒስቴር መስሪያ ቤቱም ከኤሚግሬሽን ጋር በቴክኖሎጂው የሚተሳሰር በመሆኑ የዜጎችን መረጃ በቀላሉ በማግኝት የስራ ውል ወደ ገቡበት ሀገራት በተፈለገው ጊዜ እንዲደረሱም ያስችላል።

ከተቋማት ጋር የሚኖርን የሰነዶች ልውውጥ እና የማረጋገጥ ሂደት በቴክኖሎጂው በመረጃ መረብ አማካኝነት የሚከናውን በመሆኑ የሀሰተኛ ሰነዶችን ለመቆጣጠር ይረዳል።

ይህም በተቋማት መካከል የተቀናጀ አስራርን በመፍጠር ህገ ወጥ የሰዎች ዝውውር በማስቀረት ህጋዊ የስራ ስምሪቱ እንደሚያሳልጠው ሚኒስትር ዴኤታዋ ገልፀዋል።

በበላይ ተስፋዬ

You might also like
Comments
Loading...