Fana: At a Speed of Life!

የክልሉን የትምህርት ጥራት ለማሻሻል ሁሉም ባለድርሻ አካላት የበኩላቸውን ሊወጡ ይገባል-አቶ ተመስገን ጥሩነህ

አዲስ አበባ፣ ነሃሴ 7፣ 2011 (ኤፍ ቢ ሲ) በአማራ ክልል ያለውን የትምህርት ጥራት ለማሻሻል ሁሉም ባለድርሻ አካላት ርብርብ ሊያደርጉ እንደሚገባ ርዕሰ መስተዳድር አቶ ተመስገን ጥሩነህ አሳሰቡ።
 
የአማራ ክልል ትምህርት ቢሮ የ2012 የትምህርት ዘመን የትምህርት ንቅናቄ መድረክ በባህር ዳር ከተማ እያካሄደ ነው።
 
በንቅናቄ መድረኩ ላይ ንግግር ያደረጉት ርዕሰ መስተዳድር አቶ ተመስገን ጥሩነህ ትምህርት የሁሉም ነገሮች መፍቻ ቁልፍ መሳሪያ መሆኑን አንስተዋል።
 
የተማረ ዜጋና ማህበረሰብ የተሻለ ሀገር ለመፍጠር ብቸኛ አማራጭ መሆኑን ያነሱት ርዕሰ መስተዳድሩ፥ የክልሉን የትምህርት ጥራት ለማስጠበቅ ሁሉም ባለ ድርሻ አካላት የበኩላቸውን አስተዋፅኦ እንዲያበረክቱ ጥሪ አቅርበዋል።
 
የተጀመረውን የትምህርት ንቅናቄ ከስራ እድል ፈጠራ፣ከግብርና፣ሰላምና መልካም አስተዳደር እንዲሁም ከሌሎች ዘርፎች ጋር በማቀናጀት መስራት እንደሚገባም ጠቁመዋል።
 
የክልሉ ትምህርት ቢሮ ሃላፊ ዶክተር ይልቃል ከፋለ በበኩላቸው፥ በ2011 በጀት ዓመት የትምህርት ጥራትን ለማሻሻል ከ481 በላይ ከሚሆኑት መደበኛ መማሪያ የዳስ ክፍሎች መካከል 408 በሚሆኑት ሙሉ በሙሉ የደረጃ ማሻሻያ እንደተሰራላቸው ተናግረዋል።
 
ቀሪ የመደበኛ መማሪያ የዳስ ክፍሎችን የማሻሻል ስራ እየተከናወነ መሆኑን የገለጹት ሃላፊው፥ በተያዘው በጀት ዓመት ከ600 ሺህ በላይ የሚሆኑ ለትምህርት የደረሱ ህፃናትን ለመመዝገብ መታቀዱን አንስተዋል።
 
በክልሉ ከመስከረም 6 ቀን እስከ 11 ቀን 2012 ዓ.ም በሁሉም ትምህርት ቤቶች ምዝገባ የሚካሄድ መሆኑንም ዶክተር ይልቃል ተናግረዋል።
 
ይሁን እንጂ በተለያዩ ምክንያቶች በተጠቀሰው ጊዜ ውስጥ መመዝገብ ያልቻሉ ተማሪዎች እስከ መስከረም 30 ቀን 2012 ዓ.ም ድረስ ብቻ መመዝገብ የሚችሉ መሆኑን አስገንዝበዋል።
 
በተያያዘ በ2012 በጀት ዓመት የክልሉን የትምህርት ጥራት ለማሻሻል የሚውል 21 ነጥብ 1 ቢሊየን ብር ለመሰብሰብ ማቀዱን የአማራ አቀፍ ልማት ማህበር (አልማ) ዋና ስራ አስፈፃሚ አቶ መላኩ ፈንታ አስታውቀዋል።
 
በናትናኤል ጥጋቡ
You might also like
Comments
Loading...