Fana: At a Speed of Life!

የከፍተኛ ትምህርት ዘርፍ የለውጥ ስራዎችን ማስጀመሪያ መድረክ እየተካሄደ ነው

አዲስ አበባ፣ ነሃሴ 13፣ 2011 (ኤፍ.ቢ.ሲ) የከፍተኛ ትምህርት ዘርፍ የለውጥ ስራዎችን ማስጀመሪያ መድረክ በዛሬው እለት እየተካሄደ ነው።

በሸራተን አዲስ ሆቴል እየተካሄደ ባለው መድረክ ላይም የሳይንስና ከፍተኛ ትምህርት ሚኒስቴር እና የከፍተኛ ትምህርት ተቋማት የሥራ ኃላፊዎች በመሳተፍ ላይ ይገኛሉ።

በመድረኩ ላይ በከፍተኛ ትምህርት ዘርፍ በ2012 የትምህርት ዘመን የሚተገበሩ አሠራሮችን እና በዩኒቨርሲቲዎች ሰላማዊ መማር ማስተማር እንዲኖር ማድረግ በሚያስችሉ ጉዳዮች ላይ ውይይት እየተደረገ ነው።

በሸራተን ሆቴል እየተካሄደ በሚገኘው የከፍተኛ ትምህርት ዘርፍ የለውጥ ስራዎችን ማስጀመሪያ መድረክ ላይ የመነሻ ፅሁፎች ቀርበው ውይይት እየተደረገባቸው ነው።

በመድረኩ ላይ የውይይት መነሻ ጽሁፍ ያቀረቡት የሳይንስና ከፍተኛ ትምህርት ሚኒስትር ዲኤታ ዶክተር ሳሙኤል ክፍሌ፥ በኢትዮጵያ የምርምር ተቋም ሊሆን የሚችል ዩኒቨርሲቲ እንደሌለ አመላክተዋል።

በአለም አቀፍ መስፈርት መሰረት 50 በመቶ የከፍተኛ ትምህርት ተቋማት አባላት ፕሮፌሰሮች ሊሆኑ እንደሚገባም ሚኒስትር ዲኤታው ጠቅሰዋል።

በዚህ መስፈርት ከታየም በኢትዮጵያ ይህንን የሚያሟላ ዩኒቨርሲቲ ባለመኖሩ የምርምር ተቋም ሊሆን የሚችል ዩኒቨርሲቲ እንደሌለ ተናግረዋል።

በመሆኑም የዩኒቨርሲዎችን አቅም መገንባት በቀጣይ በትኩረት የሚሰራበት እንደሚሆንም አስገንዝበዋል።

በተጨማሪም የኢትዮጵያን የትምህርት ሥርዓት ለማሻሻል የ15 ዓመታት የትምህርት ፍኖተ ካርታ ተዘጋጅቶ ውይይት ሲደረግበት ቆይቷል።

በፍኖተ ካርታው ከቅድመ መደበኛ እስከ ከፍተኛ ትምህርት ተቋማት ባሉት ደረጃዎች ማሻሻያ የተደረገ ሲሆን፥ የዛሬው የምክክር መድረክም የማሻሻያዎቹ አካል ነው ተብሏል።

በ2012 ዓ.ም በሦስት ዓመታት ይጠናቀቅ የነበረው የዲግሪ መርሀ ግብርም ወደ አራት ዓመት ከፍ እንዲል መደረጉ በትናንትናው እለት መገለጹ ይታወሳል።

በዚህም መሰረት በ2012 ዓ.ም ወደ መንግሥትም ሆነ የግል ዩኒቨርሲቲዎች የሚገቡ አዲስ የመጀመሪያ ዓመት የዩኒቨርሲቲ ተማሪዎች ትምህርት የሚጀምሩት በ15 አዳዲስ ትምህርቶች መሆኑንም ነው የሳይንስና ከፍተኛ ትምህርት ሚኒስትሯ ፕሮፌሰር ሂሩት ወልደማርያም የተናገሩት።

የትምህርት ዓይነቶቹም በስነ ምግባር (ግብረ ገብነት)፣ በሥራ ፈጠራ ክህሎት፣ በተግባቦት፣ በሁለገብና ሰፊ አስተሳሰብ ግንባታ ላይ ያተኮሩ እንደሚሆኑም ገልፀዋል።

You might also like
Comments
Loading...