Fana: At a Speed of Life!

የከፍተኛ ትምህርት መግቢያ የፈተና ውጤት ይፋ ሆነ

አዲስ አበባ፣ ነሃሴ 7፣ 2011 (ኤፍ.ቢ.ሲ) የከፍተኛ ትምህርት መግቢያ (12ኛ ክፍል) ብሄራዊ ፈተና ውጤት ይፋ መደረጉን ሀገር አቀፍ የትምህርት ምዘናና ፈተናዎች ኤጀንሲ አስታወቀ።
 
ተፈታኞች ውጤታቸውን በኤጀንሲው ድረ-ገጽ app.neaea.gov.et በመግባት Admission በሚለው ሳጥን ውስጥ የመፈተኛ ቁጥራቸውን (Registration Number) በማስገባትና go የሚለውን አንዴ በመጫን መመልከት የሚችሉ መሆኑን አስገንዝቧል።
 
በተጨማሪም ተማሪዎች ከምሽት 2፡00 ጀምሮ በአጭር የፅሁፍ መልእክት 8181 ላይ ID የሚል የእንግሊዝኛ ፊደላትን በመጻፍ፣ ክፍተት በመስጠትና የመፈተኛ ቁጥራቸውን /Registration number/ ጽፎ በመላክ ውጤታቸውን መመልከት የሚችሉ መሆኑን ኤጀንሲው ገልጿል።
 
በዓመቱ ፈተናውን ከወሰዱ ተማሪዎች ውስጥ ከፍተኛው ውጤት 645 ሆኖ የተመዘገበ ሲሆን፥59 ተማሪዎች ደግሞ ከ600 በላይ ማምጣታቸው ተገልጿል።
 
ኤጀንሲው በዛሬው ዕለት በሰጠው መግለጫ በአጠቃላይ ፈተናውን ከወሰዱት ተማሪዎች ውስጥ 48 ነጥብ 59 በመቶ የሚሆኑት ከ350 በላይ ውጤት ማምጣታቸውን አስታውቋል።
 
ኤጀንሲው ፈተናው በተሰጠበት ወቅት የፈተና ህግ ጥሰት መፈፀማቸው በወቅቱ ከቀረቡ ሪፖርቶችና ተያያዥ መረጃዎች በመረጋገጡ የ68 ተፈታኞች ውጤት ሙሉ በሙሉ እንዲሰረዝ መደረጉን ገልጿል።
 
በተጨማሪም የህግ ጥሰት የፈፀሙ 846 ተፈታኞች ውጤት የተወሰኑ የትምህርት አይነቶች ላይ የማጣራት ስራ እስኪሰራ ድረስ ውጤታቸው ታግዶ የሚቆይ መሆኑ ተጠቁሟል።
 
በተያያዘ የ12 ኛ ክፍል ተማሪዎች ወደ ዩኒቨርሲቲ መግቢያ የማለፊያ ውጤት በቅርቡ ይፋ የሚደረግ መሆኑን ኤጀንሲው አስታውቋል።
 
ዘንድሮ ከበፊቱ በተለየ መልኩ ተማሪዎች የሚመርጡት የማህበረሰብ ሳይንስ እና የተፈጥሮ ሳይንስ ብቻ በሚል መሆኑም ተመላክቷል።
 
በዚህ መሰረትም ተማሪዎች ዩኒቨርሲቲ ከገቡ በኋላ “የፍሬሽ ማን ኮርስ” ከወሰዱ በኋላ የሚማሩበትን የትምህርት ዘርፍ የሚመርጡ ይሆናል።
 
በሌላ በኩል በዚህ ዓመት የተፈጥሮ ሳይንስ ተማሪዎች ከፈለጉ የማህበረሰብ ሳይንስ ትምህርት ዘርፍን መምረጥ የሚችሉ መሆኑ ተገልጿል።
 
የዩንቨርስቲ መግቢያ (የ12ኛ ክፍል) ፈተና ለመውሰድ ከተመዘገቡት 322 ሺህ 717 ተማሪዎች መካከል 319 ሺህ 264 የሚሆኑት ፈተናውን መውሰዳቸውን ከኢጀንሲው የተገኘ መረጃ ያመለክታል።
 
በአልአዛር ታደለ
You might also like
Comments
Loading...