Fana: At a Speed of Life!

የኢትዮ-ጃፓን ቢዝነስና ኢንቨስትመንት ፎረም ተካሄደ

አዲስ አበባ ፣ ነሃሴ 24 ፣ 2011 (ኤፍ ቢ ሲ) በዮኮሃማ ጃፓን እየተካሄደ ካለው 7ኛው የቲካድ ስብሰባ ጎን ለጎን ሁለተኛው የኢትዮ – ጃፓን የቢዝነስ ፎረምና አውደ ርዕይ ተካሂዷል።

በፎረሙ ላይ 180 የጃፓን ባለሃብቶች እንዲሁም 43 የኢትዮጵያ የንግዱ ማህበረሰብ አባላት ተገኝተዋል።

የኢፌዴሪ የውጭ ጉዳይ ሚኒስትር አቶ ገዱ አንዳርጋቸው ኢትዮጵያ ከመቼውም ጊዜ በተሻለ ሁኔታ የጃፓን ባለሃብቶችን ለማስተናገድ ዝግጁ መሆኗን ጠቅሰው፥ ባለሃብቶችም ይህን ምቹ ሁኔታ እንዲጠቀሙ ጥሪ አቅርበዋል።

አምባሳደር ካሳ ተክለብርሃን በበኩላቸው ቶኪዮ የሚገኘው የኢፌዴሪ ኤምባሲ የጃፓን ባለሃብቶችን ወደ ኢትዮጵያ ለመላክ በሚያደርገው እንቅስቃሴ ከተለያዩ የጃፓን ኩባንያዎችና ተቋማት ለሚደረግላቸው ድጋፍ ምስጋና አቅርበዋል።

ኤምባሲው ባለሃብቶቹ በኢትዮጵያ ያለውን አመች የንግድና ኢንቨስትመንት ዕድሎች እንዲጠቀሙ ሙሉ ድጋፍ እንደሚያደርግም አረጋግጠዋል።

የጃፓን የውጭ ንግድ ድርጅት (ጄትሮ) ፕሬዚዳንት በኢትዮጵያ የተሻሻለ የንግድና ኢንቨስትመንት ዕድል መኖሩን አንስተው፥ ይህንን በየጊዜው ለአባላቶቻቸው እንደሚያስተዋውቁ መግለጻቸውን ከውጭ ጉዳይ ሚኒስቴር ቃል አቀባይ ፅህፈት ቤት ያገኘነው መረጃ ያመላክታል።

በአፍሪካ ልማት ዙሪያ የሚመክረው የቶኪዮ ዓለም አቀፍ ኮንፈረንስ (ቲካድ) ከፈረንጆቹ 1993 ጀምሮ አፍሪካ ከድህነትና ኋላቀርነት ለመውጣት የምታደርገውን ጥረት ለመደገፍ በጃፓን ጠንሳሽነትና አመራር ለአፍሪካ ልማት የሚካሄድ ሲሆን፥ በጥምር አዘጋጅነት የዓለም ባንክ፣ የተመድ ልማት ድርጅት እንዲሁም የአፍሪካ ህብረት ኮሚሽን እየተሳተፉ ይገኛል።

You might also like
Comments
Loading...