Fana: At a Speed of Life!

የኢትዮጵያ ምርት ገበያ ከሞዛቢክ እና ማላዊ ጋር የእውቀትና ልምድ ሽግግር አደረገ

አዲስ አበባ፣ ነሃሴ9፣ 2011 (ኤፍ.ቢ.ሲ) የኢትዮጵያ ምርት ገበያ ከሞዛቢክ እና ማላዊ ምርት ገበያዎች ጋር የእውቀትና ልምድ ሽግግር አደረገ፡፡

የሞዛምቢክ እና የማላዊ የምርት ግብይት ተቆጣጣሪ የሆኑት ሪዘርቭ ባንክ ሀላፊዎች ወደ ኢትዮጵያ ምርት ገበያ በመምጣት የእውቀትና ልምድ ልውውጥ አድረገዋል፡፡

ከነሐሴ 7እስከ 9 ቀን 2011 በኢትዮጵያ በአደረጉት ቆይታ በህግ ማስከበር፣ በመጋዘን፣ በጥራትና በግብይት ኦፕሬሽን፣ በገበያና መጋዘን ደህንነት ክትትል፣ በክፍያና ርክክብ፣ በገበያ መረጃ ስርጭት ስላለው አሰራር በምርት ገበያው ስራ አመራር አባላት ገለፃ ተደርጎላቸዋል፡፡

በዋናው መስሪያ ቤት ያሉትን የምርት ፍተሻ ማዕከላዊ ላቦራቶሪ፣ የኤሌክትሮኒክስ የግብይት ማዕከልና የአዲስ አበባ ቅርንጫፍ መጋዘንን ጎብኝተዋል፡፡

ምርት ገበያው በህግ፣ በቴክኖሎጂና በእውቀት ላይ የተመሰረተ ልምድ ለአፍሪካ ሀገራት ምርት ገበያዎች ከማሸጋገሩ በተጨማሪ አቅሙን ወደ ስልጠና በማሸጋገር ለመሸጥ የሚችልበት ደረጃ ላይ መድረሱም ነው የተገለጸው፡፡

በቅርቡ በሚመሰርተው አካዳሚ ለአፍሪካ ሀገራት የዘርፉ አቅም ግንባታ የሚያግዙ ስልጠናዎችን መስጠት እንደሚጀምርም ነው የተነገረው፡፡፡፡

ባለፉት አመታት ሞዛምቢክ፣ ጋና፣ ታንዛኒያ፣ ሩዋንዳና ሌሎችም አገሮች በተመሳሳይ መንገድ በቀሰሙት ልምድ የየሀገራቸውን ምርት ገበያ ለመመስረት መብቃቱን የኢትዮጵያ ምርት ገበያ ለፋና ብሮድካስቲንግ የላከው መግላጫ ያመላክታል፡፡

የሞዛምቢክ ምርት ገበያ ሀላፊዎች በግንቦት ወር 2007 ለአምስት ተከታታይ የስራ ቀናት ከፍተኛ አመራሮችን ልከው መሰልጠናቸውን መግለጫው አስታውሷል፡፡

ይህም ሀገራቱ በዘርፉ ላይ ተባብረው እንዲሰሩና ድንበር የለሽ ዘመናዊ የግብይት ስርዓት እንዲዘረጉ አስተዋፅዖ እንደሚያደረግ የተገለጸ ሲሆን በቅርቡ የተፈረመውን ነፃ ገበያ ስምምነትና በሀገራት መካከል የሚፈረሙ የሁለትዮሽና ቀጣናዊ የኢኮኖሚ ትብብር ስምምነቶች ለምርት ገበያዎቹ ጥምረት አስተዋፅኦ ይኖራቸዋል ነው የተባለው፡፡

በዚህ ረገድ የኢትዮጵያ ምርት ገበያ የመሪነቱን ቦታ በመውሰድ ተቋማዊ አቅሙን በማጠናከር ለአፍሪካ ምርት ገበያዎች እውቀትና ልምድ ማሸጋገሩን አጠናክሮ ይቀጥላል፡፡

You might also like
Comments
Loading...