Fana: At a Speed of Life!

የአማራ ባንክ የአክሲዮን ሽያጭ በይፋ ተጀመረ

አዲስ አበባ፣ ነሃሴ 12፣ 2011 (ኤፍ.ቢ.ሲ) የአማራ ባንክ ምሥረታ የአክሲዮን ሽያጭ በይፋ ተጀምሯል፡፡

የባንኩ አደራጅ ኮሚቴ ሰብሳቢ አቶ መላኩ ፈንታ ‹‹የባንኩ መመሥረት በሀገር እና በክልል ያለውን የልማት ፍላጎት ለማስፋት ይረዳል›› ብለዋል፡፡

ሰፊ የገበያ ክፍተቱን እና የሚጠየቁ ልማቶችን ለመመለስ ያሉት ባንኮች በቂ አለመሆናቸውን ያመለከቱት አቶ መላኩ አሁን የተመሠረተው ባንክ ይህንን ለመመለስ ከፖሊሲ ሰነዶች ጀምሮ እስከ ደንብ እና መመሪያ አዘጋጅቶ ማጠናቀቁን አንስተዋል።

ኢንቨስትመንት እና የውጭ ምንዛሪ ተቀማጭ እንዲኖርና ዳያስፖራውም ተጠቃሚ እንዲሆን ያለመ እንደሆነም ነው አቶ መላኩ ፈንታ በሸራተን አዲስ በተከናወነው የባንኩ ምስረታ ስነ ስርዓት ላይ የተናገሩት፡፡

ኢንዱስትሪው በሀገሪቱ ኢኮኖሚ ከፍተኛ ሚና የሚጫወት በመሆኑ ባለፉት ጊዜያት የአቅርቦት እና ፍላጎት አለመመጣጠን ችግሮች እንዲፈጠሩ የባንኮች አለመመሥረት ምክንያት እንደነበር የአማራ ክልል ኢንዱስትሪ እና ኢንቨስትመንት ቢሮ ኃላፊ አቶ መላኩ አለበል ተናግረዋል፡፡

ባንኩ በተለይም የገጠር አካባቢ ነዋሪዎችን የዘርፉን ችግር እንደሚፈታም አቶ መላኩ አለበል ተስፋቸውን ገልጸዋል፡፡

የአማራ ባንክ ፕሮጀክት ማናጀር ወይዘሮ መሰንበት ሸንቁጤ በበኩላቸው ባንኩን ለመመሥረት የተከናወኑ ተግባራትን፣ ውሳኔ የሚያስፈልጋቸው ተግባራትን እና የወደፊት የሥራ ሂደት ዙሪያ ማብራራያ ሰጥተዋል፡፡

የአንድ አክሲዮን ዋጋ አንድ ሺህ ብር መሆኑ የተገለጸ ሲሆን÷ አንድ ሰው መግዛት የሚችለው ዝቅተኛ የዕጣ ብዛት 10 እንደሆነ ነው የገለጹት፡፡

የከፍተኛው የአክሲዮን ሽያጭ ዕጣ ብዛት 100 ሺህ እንደሆነም የአማራ መገናኛ ብዙሃን ድርጅት ዘግቧል፡፡

You might also like
Comments
Loading...