Fana: At a Speed of Life!

የትግራይ እና ባህርዳር ስታዲየሞች የካፍ ውድድሮችን እንዲያካሂዱ ጊዜያዊ ፈቃድ አገኙ

አዲስ አበባ ፣ ነሃሴ 1 ፣ 2011 (ኤፍ ቢ ሲ) የትግራይ እና ባህርዳር ስታዲየሞች የካፍ ውድድሮችን እንዲያካሂዱ ጊዜያዊ ፈቃድ ማግኘታቸውን የኢትዮጵያ እግር ኳስ ፌዴሬሽን አስታወቀ፡፡

የትግራይ፣ የሃዋሳ፣ የባህርዳር፣ የድሬዳዋ እንዲሁም በግንባታ ላይ የሚገኘው የአዲስ አበባው አደይ አበባና አንጋፋው የአዲስ አበባ ስታድየም ከደረጃ በታች መሆናቸውን ካፍ ማስታወቁ የሚታወስ ነው፡፡

ይህንንም ተከትሎ ፌዴሬሽኑ መቐለ 70 እንደርታ በካፍ ሻምፒዮንስ ሊግ እና ፋሲል ከነማ በኮንፌዴሬሽን ዋንጫ የሚያደርጓቸውን ጨዋታዎች በትግራይ እና ባህርዳር አለም አቀፍ ስታዲየሞች ማካሄድ እንዲችሉ ጥያቄ አቅርቦ ነበር፡፡

ጥያቄውን የተመለከተው ካፍም ስታድየሞቹ የካፍ ዝቅተኛውን መስፈርት በሁለት ወራት እንዲያሟሉ በማሳሰብ የክለቦቹና የብሄራዊ ቡድኑ የካፍ ውድድሮች በሁለቱ ስታድየሞች እንዲካሄዱ በጊዜያዊነት ፈቅዷል፡፡

ካፍ የትግራይ እና ባህርዳር ስታዲየሞች ከዛሬ ነሃሴ 1 ቀን 2011 እስከ ጥቅምት 1 ቀን 2012 ያሉ ጊዜያትን ነው የፈቀደው፡፡

በእነዚህ ሁለት ወራት ስታድየሞቹ ያላሟሏቸውን ግብዓቶች እንዲያሟሉ እና የሌላ ስታድየም ግምገማ እንዲካሄድ ፌዴሬሽኑ እንዲጠይቅ ማሳሰቢያ ተሰጥቷል፡፡

You might also like
Comments
Loading...