Fana: At a Speed of Life!

የተጀመረውን መሰረታዊ ለውጥ ለማስቀጠል የህግ የበላይነትን በማስከበር ሰላምና ጸጥታን ማስፈን ይገባል-ፕሬዚዳንት ሳህለወርቅ

አዲስ አበባ፣ነሃሴ 16፣ 2011(ኤፍ ቢ ሲ) በኢትዮጵያ የተጀመረውን መሰረታዊ ለውጥ ለማስቀጠል የህግ የበላይነትን በማስከበር ሰላምና ጸጥታን ማስፈን እንደሚገባ ፕሬዚዳንት ሳህለወርቅ ዘውዴ ተናገሩ።

በኢትዮጵያ የተጀመረው የለውጥ ሂደት ዕድሎችና ተግዳሮቶች ለሰላማዊና ለሰከነ የፖለቲካ ሽግግር በሚል ርዕሰ ጉዳይ ዙሪያ የሚመክር መድረክ በተመድ የአፍሪካ ኢኮኖሚክ ኮሚሽን አዳራሽ እየተካሄደ ነው።

በውይይት መድረኩ ላይ በኢትዮጵያ ያለውን ብዝሃነት በስርዓት ማስተናገድ የሚያስፈልግ መሆኑን ፕሬዚዳንት ሳህለ ወርቅ ዘውዴ ተናግረዋል።

የተሻለ ብዝሃነትን ማስተናገድ የሚያስችል ስርዓት ለመገንባትም ሁሉም ባለድርሻ አካላት መወያየ እንደሚገባቸው አንስተዋል።

ያለንበት የሽግግር ወቅት ፈተናዎች በብቃት ለመወጣትም ያሉትን መልካም አጋጣሚዎች በመጠቀም በአንድነትና በቅንጅት መስራት ይገባል ነው ያሉት።

ለዚህም ባሳለፍናቸው ወሳኝ ታሪኮች ወቅት ያጋጠሙ ችግሮችን ለማለፍ ህዝቡ ያሳየውን ጠንካራ አንድነትና መተሳሰብ መድገም እንደሚያስፈልግ ነው የተናገሩት።

ሀገሪቱ የያዘችውን መሰረታዊ ለውጥ በተሳካ ሁኔታ ለማስቀጠልም የህግ የበላይነትን በማስከበር ሰላምና ጸጥታን ማስፈን የሚገባ መሆኑን ፕሬዚዳንት ሳህለወርቅ ተናግረዋል።

የሚፈለገው የኢኮኖሚ ለውጥና ዕድገት የሚመጣውም በሀገሪቱ ያለውን የህግ የበላይነት በዘላቂነት ማረጋገጥ ሲቻል መሆኑን አመላክተዋል።

በሌላ በኩል የኢትዮጵያ መረጋጋት ከሀገሪቱ ህዝቦች ባለፈ በቀጠናው ለሚገኙ ሀገራት ሰላም ከፍተኛ ትርጉም ያለው መሆኑን አውስተዋል።

በበላይ ተስፋዬ

You might also like
Comments
Loading...