Fana: At a Speed of Life!

የቡና ፓርክ በአዲስ አበባ ሊገነባ ነው

አዲስ አበባ፣ ነሃሴ 7፣ 2011 (ኤፍ.ቢ.ሲ) የሀገሪቱን የቡና ምርት ለአለም ለማስተዋወቅ ትልቅ ፋይዳ ይኖረዋል የተባለ የቡና ፓርክ በአዲስ አበባ ሊገነባ ነው።

በኢትዮጵያ ቡና እና ሻይ ልማት እና ግብይት ባለስልጣን የገበያ መረጃና ቁጥጥር ዳይሬክተር አቶ ኸይሩ ኑሩ ለፋና ብሮድካስቲንግ ኮርፖሬት እንደገለፁት የቡና ፓርኩ በኢትዮጲያ እና ደቡብ ኮሪያ የጋራ ትብብር ነው የሚገነባው።

በ50 ሚሊየን የአሜሪካ ዶላር የሚገነባው ፓርኩ፤ በ30 ሄክታር መሬት ላይ የሚያርፍና 6 ዋና ዋና ጉዳዮች ላይ የሚያተኩሩ ማዕከላትን ያቀፈም ነው ብለዋል።

በቡና ፓርኩ ከሚታቀፉ ማዕከላትም የቡና ሙዝየም አንዱ ሲሆን፥ በሙዝየሙም በሀገሪቱ በሁሉም አካባቢዎች የሚመረቱ የቡና አይነቶች ከፍሬው እስከ ሲኒው ድርስ የሚያልፉት ደረጃ በተግባር የሚታይበት ነው።

እንዲሁም የቡና ምርት ከአመራረቱ እስከ ግብይት ስርዓቱም የሚከናወንበትም ፓርክ ነው።

በተፈጥሮአዊ ጣዕሙ የሚስተካከለው የሌላ ሀገር ምርት ባለመገኘቱ ብቻ ዛሬም በአለም ገበያ ተፈላጊ መሆን የቻለውን የኢትዮጵያን የቡና ምርት የአለም የቡና ምርት በደረሰበትን የቴክኖሎጂ ደረጃ ለማድረስ የሚያስችሉ ቴክኖሎጂዎችንም በዚሁ ማዕከል በማደራጀት የሀገርን ጥቅም ለማሳደግም መታቀዱን ዳይሬክተሩ ገልፀዋል።

ከዚህ በተጨማሪም ከለንደንና ከአሜሪካ የቡና ገበያ ጋር የሚነፃፀር አለም አቀፍ የቡና ገበያ ማዕከል በመክፈት የአፍሪካ ቡና ገበያ መነሻ እንዲሆን ለማድረግም ተውጥኗል ብለዋል።

የቡና ፓርኩ ቡናን በጥሬው ገዝታ እሴት በመጨመር ወደ አለምገበያ በማቅረብና በቴክኖሎጂ አጠቃቀምም ግንባር ቀደም ከሆነችው ደቡብ ኮሪያ ጋር የሚሰራ እንደመሆኑ፤ ከገንዘብ ድጋፉ በተጨማሪ በቴክኒክ ድጋፍም በፓርኩ ላይ ተሳትፎ እንደሚኖራት ተገልጿል።

እንዲሁም በቴክኖሎጂ ሽግግሩ ኢትዮጵያን የሚጠቅማት ሲሆን፥ ደቡብ ኮሪያዊያን ደግሞ ከዚህ ቀደም በጃፓን በኩል የሚያገኙትን የኢትዮጵያን የቡና ምርትን በቀጥታ ከኢትዮጲያ እንዲያገኙ መንገድ ይከፍትላቸዋል ተብሏል።

ይህም ደግሞ በመሀል የሚቀረውን ጥቅም ሀገሪቱ እንድታገኝ እንደሚያስችልም ነው የተገለፀው።

ፓርኩ የሚያርፍበትን 30 ሄክታር መሬት ለቱሪስት ምቹ ለአቪየሽንና ለሌሎቸ ዘመናዊ ትራንስፖርት አማራጮች ካለው ቅርበት እንዲሆንም ትኩረት በመስጠት የመለየት ስራ እየተከናወነ መሆኑን አቶ ከይሩ ገልፀዋል።

በአሁኑ ወቅት የቅድመ ጥናት ስራው ተጠናቆ በጀትም ፀድቆለት የቴክኖሎጂ መረጣና የዲዛይን ስራ የሚቀረው የቡና ፓርኩ ግንባታ በ3 ዓመት ውስጥ ተጠናቆም ወደስራ ይገባል ተብሎ ይጠበቃል።

በአሁኑ ወቅትም የፕሮጀክት ቅድመ ጥናቱ ተጠናቆ ወደ ስራ በሚገባበት ወቅት ስለሚኖር የፋይናንስ አጠቃቀም ዙሪያ ውይይት እየተካሄደ መሆኑንም አስታውቀዋል።

በሰብለወርቅ ኤሊያስ

You might also like
Comments
Loading...