Fana: At a Speed of Life!

የቀድሞው የኪርጊዝታን ፕሬዚዳንት መፈንቅለ መንግስት የማድረግ እቅድ ነበራቸው ተባለ  

አዲስ አበባ ፣ ነሃሴ 7 ፣ 2011 (ኤፍ ቢ ሲ) የቀድሞው የኪርጊዝታን ፕሬዚዳንት አልማዝቤክ አታምባዬቭ መፈንቅለ መንግስት ለማድረግ አሲረው እንደነበር የሃገሪቱ የደህንነት ተቋም አስታወቀ።

ባለፈው ሳምንት በተካሄደ ዘመቻ በመኖሪያ ቤታቸው በቁጥጥር ስር የዋሉት አታምባዬቭ መፈንቅለ መንግስት የማድረግ እቅድ ነበራቸው ተብሏል።

የኪርጊዝታን የደህንነት ተቋም ሃላፊ ኦሮዝቤክ ኦፑምባዬቭ፥ የቀድሞው ፕሬዚዳንት መፈንቅለ መንግስት ለማድረግ አሲረው እንደነበር ገልጸዋል።

አታምባዬቭ ሃገራቸውን ከፈረንጆቹ 2011 እስከ 2017 በፕሬዚዳንትነት መርተዋል።

ባለፈው ሳምንትም በስልጣን ዘመናቸው ከህግ አግባብ ውጭ ተለቋል ከተባለው የወንጀለኛ ቡድን ጋር በተያያዘ ከፖሊስ የቀረበላቸውን ጥያቄ ውድቅ አድርገዋል።

ይህን ተከትሎም የሃገሪቱ ልዩ ሃይሎች ባለፈው ሳምንት መጨረሻ ባደረጉት ዘመቻ በቁጥጥር ስር ውለዋል።

የቀድሞው ፕሬዚዳንት በስልጣን ዘመናቸው ከሙስና ጋር በተያያዘ የተጠረጠሩ ሲሆን፥ ባለፈው ሰኔ ወር ላይም ያለመከሰስ መብታቸው ተነስቷል።

እርሳቸው ግን ውንጀላውን በማስተባበል የአሁኑን አስተዳደር አካሄድ ኮንነዋል።

የ62 አመቱ አዛውንት እርሳቸውን ከተኳቸውና የቀድሞ ወዳጃቸው ከነበሩት ፕሬዚዳንት ሱሮንባይ ጄንቤኮቭ ጋር የከረረ ፍጥጫ ውስጥ መግባታቸው ይነገራል።

 

 

ምንጭ፦ አልጀዚራ

 

You might also like
Comments
Loading...