Fana: At a Speed of Life!

የሻደይ በዓል በትውልድ መካከል የታሪክ ቅብብሎሽ ለማጠናከርና ጥላቻን ለማስወገድ ትልቅ ጠቃሜታ አለው- አቶ ተመስገን ጥሩነህ

አዲስ አበባ፣ ነሀሴ 16፣ 2011 (ኤፍ.ቢ.ሲ) የሻደይ በዓል በትውልድ መካከል የታሪክ ቅብብሎሽ ለማጠናከር እና ጥላቻን ለማስወገድ ትልቅ ጠቃሜታ እንዳለው የአማራ ክልል ርዕሰ መስተዳድር አቶ ተመስገን ጥሩነህ ተናገሩ፡፡

ርዕሰ መስተዳድሩ ይህን ያሉት በዛሬው ዕለት በዋግ ኸምራ ሰቆጣ ከተማ በደማቅ ሁኔታ እየተከበረ በሚገኘው ሻደይ በዓል ላይ ነው፡፡

በበዓሉ ስነ ስርዓት ላይ የአማራ ክልል ርዕሰ መስተዳድር አቶ ተመስገን ጥሩነህ ጨምሮ የፌዴራልና የክልል የመንግስት የስራ ሃላፊዎች ታድመዋል፡፡

በዓሉ በልጃገረዶች ጭፈራ፣ በባህል ትርኢት፣ በፎቶ ኤግዚቢሽንና በተለያዩ ዝግጀቶች በሰቆጣ ከተማ እየተከበረ ይገኛል፡፡

የዋግ ኸምራ ህዝብ የቀድሞ ስልጣኔ ባለቤት መሆኑን የተናገሩት የአማራ ክልል ርዕሰ መስተዳደር አቶ ተመስገን ጥሩነህ ህዝቡ አሁንም ድረስ ባህሉን ጠብቆ መቆየቱን አንስተዋል፡፡

በዚህም አካባቢው ትልቅ የቱሪስት መዳረሻ የመሆን አቅም ያለው መሆኑንም ጠቅሰዋል፡፡

የሻደይ በዓል በተለይ ከባህላዊ ጠቃሜታው ባሻገር ከፍ ያለ ኢኮኖሚያዊና ፖሊቲካዊ ጠቃሜታ ያለው ሲሆን÷ ለአካባቢው ትውፊታዊ የሃብት እንክብካቤ ሊደረግ እደሚገባም ነው የተናገሩት፡፡

በዓሉ በትውልድ መካከል የታሪክ ቅብብሎሽ ለማጠናከር፣ ጥላቻን ለማስወገድና መተባበርን ለማጎልበት ትልቅ ጠቃሜታ እንዳለውም ገልጸዋል፡፡

የሴቶችን በራስ መተማመን ከፍ ማደረጉም የበዓሉ ትልቁ ትሩፋት ነው ብለዋል፡፡

በህዝቦች መካከል መከባበር ላይ የተመሰረተ አንድነት ከማጎልበት አንጻር ሚናው የጎላ መሆኑን በአጽኖት ጠቅሰዋል፡፡

ይህ አስደናቂ ባህል ከአከባቢው ሌላ በሀገሪቱ የተለያዩ አካባቢዎች እንዲከበር ማድረግና አለም አቀፋዊ እውቅና እንዲኖረው ማድረግ እንደሚገባም ነው አቶ ተመስገን ጥሩነህ የተናገሩት፡፡

You might also like
Comments
Loading...