Fana: At a Speed of Life!

የሰው ልጅ 11 ሺህ ጫማ ከፍታ ባለው ቦታ ላይ ይኖር እንደነበር የሚያረጋግጥ ዋሻ ባሌ ተራራ ውስጥ ተገኘ

አዲስ አበባ፣ ነሃሴ 3፣ 2011 (ኤፍ ቢሲ) የሰው ልጅ ከባሕር ጠለል በላይ 11 ሺህ ጫማ ከፍታ ባለው ተራራማ ቦታ ላይ ይኖር እንደነበር የሚያሳይ ዋሻ ኢትዮጵያ ውስጥ ባሌ ተራራ መገኘቱን አንድ ጥናት ይፋ አድርጓል።

በባሌ ተራሮች ብሄራዊ ፓርክ በተደረገው ቁፋሮ የተገኘው ጥንታዊው ዋሻ በአካባቢው ይኖሩ የነበሩ ሰዎች ይገለገሉባቸው የነበሩ የተለያዩ የእጅ መሳሪያዎችም ተገኝተውበታል።

በከፍተኛ የባህር ጠለል አካባቢዎች መኖር ለከፍተኛ የፀሃይ ጨረር፣ ለከፍተኛ ሙቀት እና ለኦክስጅን እጥረት የሚዳርግ በመሆኑ የሰው ልጅ በእነዚህ የሚያደርገውን ኑሮ ከባድ እንደሚያደርግበት ጥናቶች ያመላክታሉ።

ይፋ የተደረገው ይህ ግኝትም ሰዎች በጣም ከፍተኛ በሆኑ ቦታዎች ላይ ለመኖር ይቸገራሉ የሚለውን አስተሳሰብ የሚቃረን መሆኑ ተነግሯል።

በሳይንስ ጆርናል የወጣውና ግኝቱን ይፋ ያደረገው ጥናት እንደሚያመለካክተው ግኝቱ በመካከለኛው ዘመን የሰው ልጆች በከፍተኛ ቦታዎች ላይ ይኖሩ እንደነበር ማሳያ ነው።

በከፍተኛ ቦታዎች ይኖሩ የነበሩ ጥንታዊ የሰው ልጆች ህይወታቸውን የሚመሩት በአደን፣ ፍራፍሬዎችን በመመገብ እና የተለያዩ  ምግቦችን በማዘጋጀት መሆኑ ይታወቃል።

ምግባቸውን ለማዘጋጀትም የተለያዩ ባህላዊ የእጅ መሳሪያዎችን ይጠቀሙ እንደነበርም የግኝቱ ባለቤቶች ይፋ አድርገዋል።

መረጃው የሰው ልጆች በስፍራው ከ30 እስከ 47 ሺህ አመታት በፊት ከባህር ጠለል በላይ 11 ሺህ ጫማ ከፍታ ባለው ተራራማ ስፍራ ይኖሩ እንደነበር የሚያሳይ ነው።

በአፍሪካ የሰው ልጆች በጥንት ዘመን በከፍተኛ ቦታዎች ላይ ይኖሩ እንደነበር በተለያየ ጊዜ የተካሄዱ ጥናቶች አመላክተዋል።

እንደ አውሮፓውያኑ አቆጣጠር 2018 ላይ በቲቤት ተራራማ ስፍራዎች ላይ በተካሄደ ጥናት የሰው ልጆች ከ30 ሺህ ዓመታት በፊት ይጠቀሙባቸው የነበሩ ከድንጋይ የተሰሩ መሳሪያዎች እና የተለያዩ የዕደ ጥብብ ውጤቶች ተገኝተዋል።

በቅርቡም  በዚህ ተራራ ላይ በተካሄደ ጥናት የሰው ልጆችን ጥንታዊ ቅሬተ አካል የሚያሳይ መንጋጋ መገኘቱ ይፋ ተደርጓል።

በተመሳሳይ ባለሙያዎች በኢትዮጵያ በባሌ ተራሮች ላይ ባካሄዱት ጥናት በጥንት ዘመን በአካባቢው የሰው ልጆች ይኖሩ እንደ ነበር የሚያሳዩ ከድንጋይ የተሰሩ መሳሪያዎች መገኘታቸውን አስታውቀዋል።

ጥናቱ ጀርመን በሚገኘው ኮሎኝ ዩኒቨርሲቲ የቅድመ ታሪክ ሥነ ቁፋሮ ሳይንስ ተቋም ተመራማሪ በሆኑት ጎትዝ ኦሴንዶርፍ የተመራ ነው ተብሏል።

በጥናቱ የተገኙት ጥንታዊ  የድንጋይ መሳሪያዎችም በመቶ ሺዎች የሚቆጠር ዕድሜ ሊኖራቸው እንደሚችል ተጠቁሟል።

ከዚህ ባለፈም ተመራማሪዎች ለሰዎች መኖሪያነት ያገለግሉ የነበሩ 331 የሚሆኑ የድንጋይ ዋሻዎችና የተለያዩ የሰው ልጅ ቅሬት አካላት ማግኘታቸውን አስታውቀዋል።

ምንጭ፦ ኒው ዮርክ ታይምስ

You might also like
Comments
Loading...