Fana: At a Speed of Life!

የርብ ግድብ ማስተንፈሻዎች ሊከፈቱ ስለሚችሉ በታችኛው ተፋሰስ ያሉ ነዋሪዎች እንዲጠነቀቁ መልዕክት ተላለፈ

አዲስ አበባ ፣ ነሃሴ 6 ፣ 2011 (ኤፍ ቢ ሲ) በደቡብ ጎንደር መስተዳድር ዞን የሚገኘው የርብ ግድብ የሚጠበቀውን ያህል ውኃ በመያዙ ማስተንፈስ እንዳስፈለገ የርብ ግድብ ፕሮጀክት ተጠባባቂ ተጠሪ መሐንዲስ አስታወቁ።

ተጠባባቂ ተጠሪ መሐንዲሱ ኢንጂነር አሸብር ቶንጃ ለአማራ ብዙሃን መገናኛ ድርጅት እንዳስታወቁት፥ የርብ ግድብ ውኃ መድረስ ከሚጠበቅበት 1 ሺህ 940 ሜትር ከፍታ ላይ እየደረሰ ነው።

የውኃ መጠኑ ከፍ በማለቱ በማስተንፈሻው ለመውጣት የ50 ሴንቲ ሜትር ከፍታ ብቻ እንደቀረው ጠቅሰው፥ በጉና ተራራና አካባቢው ዛሬ ምሽት ከፍተኛ ዝናብ ከጣለ ውኃው በማስተንፈሻው በኩል ሊወጣ ይችላል ብለዋል።

በመሆኑም በተፋሰሱ ዳርና ዳር የሚገኙ ነዋሪዎች ጥንቃቄ እንዲያደርጉ አሳስበዋል።

ከግድቡ አካባቢ መደብ ጉግዳ ቀበሌ አንስቶ እስከ አዲስ ዘመንና ፎገራ ሜዳ ድረስ ያሉ ነዋሪዎች ከፍተኛ ጥንቃቄ እንዲያደርጉ ያሳሰቡት ተጠባባቂ መሐንዲሱ፥ ጎርፉ እስከ 10 ኪሎ ሜትር ስኩየር ድረስ ሊሸፍን እንደሚችልም ተናግረዋል።

የርብ ግድብ 234 ሚሊየን ሜትር ኩብ ውኃ የመያዝ አቅም ያለው ሲሆን፥ አሁን ላይም ግድቡ መያዝ የሚችለውን የውኃ መጠን ለመያዝ መቃረቡን አስረድተዋል።

ይህን ተከትሎም የግድ ማስተንፈስ የሚጠይቅበት ደረጃ ላይ ደርሷል ነው ያሉት።

የርብ ወንዝ ሞልቶ በሊቦ ከምከም እና ፎገራ ወረዳዎች ጉዳት አድርሷል።

You might also like
Comments
Loading...