Fana: At a Speed of Life!

የምዕራብ ኢትዮጵያ ክልሎች የልማትና የህዝብ ለህዝብ ግንኙነት መድረክ ተጠናቀቀ

አዲስ አበባ፣ ነሃሴ 14፣ 2011 (ኤፍ.ቢ.ሲ) ከተናንት ጀምሮ ሲካሄድ የነበረዉ የምዕራብ ኢትዮጵያ ክልሎች የልማትና የህዝብ ለህዝብ ግንኙነት መድረክ ዛሬ ተጠናቋል።
 
በመድረኩ የኦሮሚያና የቤኒሻንጉል ጉሙዝ ክልሎች የጋራ የልማትና የሰላም ማስተባበሪያ ጽህፈት ቤት የ2011 ዓም ሪፖርት ቀርቦ ውይይት ተደርጎበታል።
 
የማስተባበሪያ ጽህፈት ቤቱ ዋና ዓላማ በሁለቱም ክልሎች ወሰን የሚከሰቱ ግጭቶችን ለማስወገድና የሁለቱንም ህዝቦች የጋራ ተጠቃሚነት የሚያረጋግጥ ልማት ለማረጋገጥ ታስቦ የተቋቋመው መሆኑን የጽህፈት ቤቱ ምክትል ሃላፊ አቶ ኮማንደር ወርቁ ገልፀዋል።
 
ጽህፈት ቤቱ በወሰን አካባቢዎች ለግጭት መንስኤ የሆኑ መረጃዎችን መሰብሰብ፣ የጋራ የመሰረተ ልማት ስራዎችን ለመስራት እንቅስቃሴ መጀመሩ፣ ጅምር የመንገድ ስራዎች፣ የንፁህ መጠጥ ዉሃ ግንባታ፣ የትምህርት ቤት ግንባታና ማስፋፊያ ስራዎችን እንዲሁም የተፈናቀሉ ወገኖችን ወደ ቀያቸዉ የመመለስ ስራዎችን መስራት መቻሉን በሪፖርቱ ተገልጿል።
 
ማስተባበሪያ ጽህፈት ቤቱ ያከናወናቸዉ ስራዎች የሚበረታቱ በመሆናቸው ተሞክሮው ወደ ሌሎች አካባቢዎች በመተግበር እንደሚገባ ተገልጿል።
 
የሁለቱ ክልል መንግስታት በስልጠና፣ በሰው ሃይል ግንባታና በበጀት ድጋፍ ማድረግ እንደሚገባቸው ተሳታፊዎች አስተያት ተሰጥቷል።
 
በውይይቱ መድረኩ በቀረቡ ጥናቶች ለህገ ወጥ የሰዎች ዝውውር ምክንያቶች እና መፍትሔዎች የቀረበ ሲሆን ግጭት፣ የስራ አጥነት፣ የቤተሰቦች አመለካከት እና ህገ ወጥ አዘዋዋሪዎች ዋነኛ መንስኤዎች መሆናቸው ተጠቁሟል።
 
በመጨረሻም በኦሮሚያ እና በቤኒሻንጉል ጉሙዝ ክልሎች አጎራባች ዞኖችና ወረዳዎች የጋራ የልማትና የሰላም ስምምነት የፊርማ ስነ ስረዓት በመፈራረም ውይይቱ መጠናቀቁን የቤኒሻንጉል ጉሙዝ ክልል መንግስት ኮሙኒኬሽን ጉዳዮች ጽህፈት ቤት አስታውቋል።
You might also like
Comments
Loading...