Fana: At a Speed of Life!

ዛምቢያ በድሮን ኮንትሮባንድን መቆጣጠር ጀምራለች

አዲስ አበባ ፣ ነሃሴ 14 ፣ 2011 (ኤፍ ቢ ሲ) ዛምቢያ ኮንትሮባንድን ለመከላከል ሰው አልባ አነስተኛ አውሮፕላኖችን (ድሮን) መጠቀም ጀምራለች።

የሃገሪቱ ገቢዎች ሚኒስቴር መስሪያ ቤት በህገ ወጥ መልኩ ሸቀጦችን ወደ ሃገር ውስጥ የሚያስገቡ የጭነት ማመላለሻ አሽከርካሪዎችን ለመቆጣጠር ድሮንን መጠቀም ጀምሯል።

በዚህም በሳምንቱ መጨረሻ ብቻ በሰሜናዊ የሃገሪቱ ክፍል ሰባት የጭነት ማመላለሻ ተሽከርካሪዎችን መያዙን አስታውቋል።

ድሮኖቹ የጉምሩክ ተቆጣጣሪ ሰራተኞች መድረስ በማይችሉባቸውና ለመቆጣጠር አስቸጋሪ በሆኑ ስፍራዎች ጥቅም ላይ እንደሚውሉም ሚኒስቴሩ ገልጿል።

በዚህ ሂደት ሸቀጦችን በህገ ወጥ መልኩ ከጎረቤት ሃገራት ወደ ዛምቢያ ለማስገባት ከዋናው መንገድ በመውጣት ሰዋራ መንገዶችን የሚጠቀሙ ተሽከርካሪዎችን መቆጣጠር ተጀምሯል ነው ያለው።

አሽከርካሪዎች ከዋናው መንገድ በመውጣት በህገ ወጥ መልኩ የሚያስገቧቸውን ሸቀጦች በአነስተኛ ተሽከርካሪዎች በመገልበጥ ወደ መሃል ሃገር ያስገቧቸዋል።

በዚህ ሂደትም መንግስት ማግኘት ያለበትን የቀረጥ ገቢ እያሳጡት ነው ብሏል።

ሚኒስቴሩም በድሮን አማካኝነት ይህን ሂደት መቆጣጠር መጀመሩን አስታውቋል።

 

 

ምንጭ፦ ቢቢሲ

 

You might also like
Comments
Loading...