Fana: At a Speed of Life!

ወ/ሮ ዳግማዊት ሞገስ በአዲስ አበባ ከተማ አስተዳደር የትራንስፖርት ቢሮ እየተሰሩ ያሉ ፕሮጀክቶችን ጎበኙ

አዲስ አበባ፣ነሃሴ 6፣ 2011(ኤፍ ቢ ሲ) የትራንስፖርት ሚኒስትር ወይዘሮ ዳግማዊት ሞገስ በአዲስ አበባ ከተማ አስተዳደር የትራንስፖርት ቢሮ እየተሰሩ ያሉ ፕሮጀክቶችን ጎበኙ።

የትራንስፖርት ሚኒስትር ዴኤታ ወይዘሮ ሙሉ ገብረእግዚአብሔር እና በአዲስ አበባ ከተማ አስተዳደር በምክትል ከንቲባ ማእረግ የትራንስፖርት የቢሮ ሃላፊ ዶክተር ሰለሞን ኪዳነ በፕሮጀክቶቹ ጉብኝት ላይ ተሳትፈዋል።

በጉብኝት ስነ ስርዓቱ የመርካቶ አውቶብስ ተርሚናል የተመለከቱ ሲሆን፥ ተርሚናሉ ሁለት ፎቅ ያለው ሆኖ በአንድ ጊዜ 20 አውቶብሶችን የሚያስተናግድ እና እስከ 2 ሺህ ሰው የመጫን አቅም ያለው መሆኑ ተገልጿል።

ከዚህ ባለፈም ተርሚናሉ በቂ የመጠበቂያ ቦታ ያለውና ለአካል ጉዳተኞች የሊፍት አገግሎት የተዘጋጀ መሆኑን ለማየት ተችሏል።

ፕሮጀክቱ ተጠናቆ አገልግሎት መስጠት ሲጀምርም በሰዓት 6 ሺህ ተጠቃሚዎችን ማስተናገድ የሚችል መሆኑ ተገልጿል።

በሌላ በኩል የሸጎሌ እና የቃሊቲ አውቶብስ ተርሚናሎች የጉበኝቱ አካል ሲሆኑ፥ፕሮጀክቶቹ በጥሩ የአፈፃፀም ደረጃ ላይ መሆናቸው ተገልጿል።

የአውቶብስ ዴፖዎቹ የራሳቸው የጥገና ማዕከል፣ የነዳጅ ማደያ፣ ዘመናዊ የመኪና የማጠቢያ ቦታና ሰፊ የማቆሚያ ቦታ ያላቸው መሆኑ ተመላክቷል።

ወይዘሮ ዳግማዊት ሞገስ የከተማው አስተዳደር የትራንስፖርት ቢሮ ፕሮጀክቶችን በቅርበት በመከታተል በወቅቱ ተጠናቀው ለህብረተሰቡ አገልግሎት እንዲሰጡ ላደረጉት ከፍተኛ ጥረት ምስጋና አቅርበዋል።

ደህንነቱ የተጠበቀ ቀልጣፋ የትራንስፖርት አገልግሎት እንዲኖር በቀጣይም ተጣናክሮ ሊሠራ እንደምገባ አሳስበዋል።

ሚኒስትር ዴኤታ ወይዘሮ ሙሉ ገብረእግዚአብሔር በበኩላቸው፥ ይህ ትልቅ ውጤትና ጅማሮ በሌሎች የሀገሪቱ ክፍሎችም ሊስፋፋ እንደሚገባና ህብረተሰቡም እንዲያውቀዉ የግንዛቤ ማስጨበጥ ስራ ሊሰራ ይገባል ብለዋል።

የከተማ አስተዳደሩ ትራንስፖርት ቢሮ የከተማውን የትራንስፖርት አገልግሎት አሰጣጥ ለማዘመን እየተሠሩ ስላሉት ፕሮጀክቶች ማብራሪያ መስጠቱን ከትራንስፖርት ሚኒስቴር ያገኘነው መረጃ ያመላክታል።

You might also like
Comments
Loading...