Fana: At a Speed of Life!

ኢትዮጵያ እና አሜሪካ ሽብርተኝነትን በጋራ ለመከላከል የሚያስችል የመግባቢያ ስምምነት ተፈራረሙ

አዲስ አበባ ፣ ነሃሴ 8 ፣ 2011 (ኤፍ ቢ ሲ) የኢትዮጵያና የአሜሪካ የደህንነት ተቋማት በዓለም አቀፍ ደረጃ እየተወሳሰበ የመጣውን ሽብርተኝነት በጋራ መከላከል የሚያስችል የመግባቢያ ስምምነት ተፈራርመዋል።

ስምምነቱን የብሔራዊ የመረጃና ደህንነት አገልግሎት ዋና ዳይሬክተር ጀነራል ኮሚሽነር ደመላሽ ገብረሚካኤል እና የአሜሪካ የምርመራ ቢሮ (ኤፍ ቢ አይ) ረዳት ዳይሬክተርና የሽብርተኝነት ማጣሪያ ማዕከል ዳይሬክተር ቻርልስ ኬብል ተፈራርመውታል።

የብሔራዊ የመረጃና ደህንነት አገልግሎት ዋና ዳይሬክተር ጀነራል ኮሚሽነር ደመላሽ ገብረሚካኤል፥ አልሸባብ፣ አልቃይዳና አይ ኤስ የኢትዮጵያን ብሔራዊ ደህንነት አደጋ ላይ ለመጣል በተለያየየ ጊዜ ሙከራ ማድረጋቸውን ጠቅሰዋል።

ይሁን እንጅ የሃገሪቱ የጸጥታ ሃይል ተደራጅተው በነበሩ ሽብርተኞች ላይ እርምጃ በመውሰድ ከሃገሪቱ አልፎ በአፍሪካ ቀንድ ሰላምና መረጋጋት እንዲሰፍን ትልቅ አስተዋጽኦ አበርክቷል ነው ያሉት።

ኢትዮያጵያ ሽብርተኝነትን በብቃት ለመከላከል ከሌሎች ሃገራት ጋር ለመስራት ዝግጁ መሆኗን ጠቅሰው፥ በተለይም ከአሜሪካ ጋር ሽብርተኝነትን በዓለም አቀፍና በቀጠና ደረጃ ለመከላከል ስምምነት ላይ መድረሷ የፀረ-ሽብር እንቅስቃሴውን ውጤታማ ያደርገዋል ነው ያሉት።

የአሜሪካ የምርመራ ቢሮ ረዳት ዳይሬክተር እና የሽብርተኝነት ማጣሪያ ማዕከል ዳይሬክተር ቻርልስ ኬብል በበኩላቸው፥  በስምምነቱ መሠረት ሁለቱ የደህንነት ተቋማት ሽብርተኞችን በተመለከተ ቴክኒካዊ መረጃዎችን እንደሚለዋወጡ ተናግረዋል።

ይህም የሁለቱን ሃገራት የሽብር ጥቃት የተጋላጭነት እድል እንደሚቀንሰው ገልጸዋል።

በተጨማሪም ስምምነቱ ሁለቱ ሃገራት በአልሸባብ፣ በአልቃይዳና በአይ ኤስ አማካኝነት በአፍሪካ ቀንድ የሚደቀን የሽብር ስጋትን በመተንተንና በመተንበይ፥ በህዝብ ላይ ከፍተኛ ጉዳት እንዳይደርስ አስቀድመው የመከላከል እርምጃ እንዲወስዱ  ያግዛቸዋልም ብለዋል ዳይሬክተሩ።

ስምምነቱ በተለይም የአፍሪካ መዲና እና የዓለም አቀፍ ተቋማት መቀመጫ ለሆነችው አዲስ አበባ እና ለኢትዮጵያ አየር መንገድ ከሽብር ጥቃት ነጻ እንዲሆኑ ዋስትና እንደሚሰጥ ታምኖበታል።

በስምምነቱ መሰረት የሁለቱ ሃገራት የደህንነት ተቋማት ሽብርተኞች በስውር የሚያደርጉትን እንቅስቃሴ መቆጣጠር የሚያስችል በቴክኖሎጂ የታገዘ የመረጃ ልውውጥ ያደርጋሉ።

በዚሁ መሰረትም በዛሬው እለት የሁለቱ ሃገራት የቴክኒክ ቡድን በጋራ ስራ መጀመሩን ከብሄራዊ የመረጃና ደህንነት አገልግሎት ያገኘነው መረጃ ያመላክታል።

 

 

You might also like
Comments
Loading...