Fana: At a Speed of Life!

ኢራቅ እስራኤል በባህረ ሰላጤው የባህር መስመር የሚኖራት ተሳትፎ ተቀባይነት እንደሌለው አስታወቀች

አዲስ አበባ ፣ ነሃሴ 7 ፣ 2011 (ኤፍ ቢ ሲ) ኢራቅ እስራኤል በባህረ ሰላጤው የባህር መስመር የመርከቦችን ደህንነት ለማስጠበቅ በሚደረገው እንቅስቃሴ ውስጥ የሚኖራት ተሳትፎ ተቀባይነት እንደሌለው አስታወቀች።

የሃገሪቱ የውጭ ጉዳይ ሚኒስትር ሞሃመድ አሊ አል ሃኪም፥ በሆርሙዝ የባህር ወሽመጥ የመርከቦችን ደህንንት ለማስጠበቅ በሚኖረው እንቅስቃሴ ውስጥ ቴል አቪቭ የሚኖራት ተሳትፎ ተቀባይነት የሌለው ነው ሲሉ በትዊተር ገጻቸው አስፍረዋል።

እንደ እርሳቸው ገለጻ ባግዳድ እስራኤል በባህረ ሰላጤው የባህር መስመር በማንኛውም መልኩ የሚኖራትን ወታደራዊ ተሳትፎ ታወግዛለች።

የባህረ ሰላጤው ሃገራትም ያለማንም እርዳታና ጣልቃ ገብነት የባህር መስመሩን ደህንነት ያስጠብቃሉም ብለዋል።

ኢራቅ በቀጠናው ያለውን ውጥረት ለማርገብ ትሰራለች ያሉት ሚኒስትሩ፥ በባህረ ሰላጤው አካባቢ የሚኖር የምዕራባውያን ጣልቃ ገብነት ውጥረቱን ያባብሰዋልም ነው ያሉት።

ከዚህ ባለፈም በአካባቢው የሚኖር የእስራኤል ተሳትፎ ለቀጠናው አውዳሚ ይሆናል ሲሉም ጠንከር ያለ አስተያየት ሰጥተዋል።

በሆርሙዝ የባህር ወሽመጥ ባለፉት ወራት በሰው አልባ አነስተኛ አውሮፕላኖች ላይ እና በነዳጅ ጫኝ መርከቦች ላይ የረተፈጸመው ጥቃትና እገታ በአካባቢው ያለውን ውጥረት አባብሶታል።

አሜሪካ እና አጋሮቿ ዓለም ላይ ከሚካሄደው የድፍድፍ ነዳጅ ዘይት ግብይት ውስጥ 20 በመቶውን በሚያስተናግደው የባህር መስመር ለተፈጸሙ ጥቃቶች ኢራንን ይኮንናሉ።

በአንጻሩ ኢራን ውንጀላውን በማስተባበል የአሜሪካን አካሄድ ታወግዛለች።

አሜሪካም በቀጠናው የንግድ መርከቦችን ደህንነት ለማስጠበቅ በሚል ከተለያዩ ሃገራት የተውጣጣ ዓለም አቀፍ የባህር ሃይል ቡድን እንዲቋቋም ጠይቃለች።

ከጉዳዩ ጋር በተያያዘ ብሪታንያ ፍላጎቷን ስታሳይ፥ ሌሎች የአውሮፓ ሃገራት ግን ጉዳዩ ከኢራን ጋር ለመድረስ የታሰበው የሰላም ስምምነት ጥረትን ይጎዳል በሚል አፈግፍገዋል።

በጉዳዩ ላይ ከእስራኤል በኩል እስካሁን የተሰማ ነገር ባይኖርም የሃገሪቱ መገናኛ ብዙሃን ግን እስራኤል በአሜሪካ ሃሳብ አመንጭነት በታቀደው የባህረ ሰላጤው የባህር መስመር የደህንነት ዘመቻ ላይ የመሳተፍ ፍላጎት እንዳላት ዘግበዋል።

 

 

ምንጭ፦ አልጀዚራ

 

You might also like
Comments
Loading...