Fana: At a Speed of Life!

አብደላ ሃምዶክ የሱዳን ጠቅላይ ሚኒስትር ሆነው ተሾሙ

አዲስ አበባ፣ ነሃሴ 16፣ 2011 (ኤፍ.ቢ.ሲ) አብደላ ሃምዶክ የሱዳን ጠቅላይ ሚኒስትር በመሆን በትናንትናው እለት ተሹመዋል።

ሌተናል ጄነራል አብደል ፈታህ አብደልራህማን ቡርሃን አዲስ የተቋቋመው የሱዳን ሉአላዊ ምክር ቤት መሪ በመሆን መሾማቸውን ተከትሎ ነው አብደላ ሃምዶክ ጠቅላይ ሚኒስትር በመሆን የተሾሙት።

እንደ አውሮፓውያኑ አቆጣጠር ከ2011 ጀምሮ የተባበሩት መንግስታት ድርጅት ኢኮኖሚስት በመሆን ሲያገለግሉ የነበሩት አብደላ ሀምዶክ ከሚሰሩበት አዲስ አበባ ወደ ካርቱም በማቅናት በትናንትናው እለት ቃለ መሃላ ፈጽመዋል።

አዲሱ ጠቅላይ ሚኒስትር አብደላ ሃምዶክ ሹመታቸውን ተከትሎ ባደረጉት ንግግር፥ የመንግስት ቀዳሚ ስራዎች ግጭቶችን ማስቆም፣ ዘላቂ ሰላም ማስፈን፣ ኢኮኖሚያዊ ቀውስን ማርገብ መሆኑን ተናግረዋል።

እንዲሁም የሀገሪቱን የውጭ ጉዳይ ፖሊሲ ላይ ማስተካከያዎቸን ማድረግም ከመንግስት ቀዳሚ ስራዎች ውስጥ ናቸው ብለዋል።

ጠቅላይ ሚኒስትር አብደላ ሃምዶክ በተባበሩት መንግስታት ድርጅት የአፍሪካ ኢኮኖሚክ ኮሚሽን ምክትል ዋና ሥራ አስፈጻሚነታቸውን የለቀቁት ባለፈው ዓመት ነበር።

አብደላ ሃምዶክ በኢኮኖሚ ተንታኝነት ከ30 ዓመት በላይ ልምድ ያላቸው ሲሆን፥ ከካርቱም ዩንቨርሲቲና ከታወቁ የእንግሊዝ ተቋሞችም ዲግሪ አግኝተዋል።

ባሳለፍነው ዓመት በቀድሞ የሱዳን ፕሬዚዳንት አልበሽር አማካኝነትም ለፋይናንስ ሚኒስተርነት ታጭተው የነበሩት አብደላ ሃምዶክ፤ የቀረበላቸውን ጥያቄም ውድቅ ማድረጋቸው አይዘነጋም።

በተያያዘ ዜና በሌተናል ጀኔራል አብደል ፋታህ ቡርሃን መሪነት ሀገሪቱን በሽግግር ጊዜ የሚያስተዳድራት ሉዓላዊ ሸንጎ በይፋ ስራውን ጀምሯል።

11 አባላት ያሉት የሱዳን ሉዓላዊ የሽግግር ሸንጎ አል በሺር ከስልጣን ከወረዱበት ሚያዚያ 2019 ጀምሮ ሀገሪቱን ሲመራ የቆየውን ወታደራዊ የሽግግር ምክር ቤትን ተክቶ ትናንት በይፋ ስራውን የጀመረው።

ሌተናል ጄነራል አብደል ፈታህ አብደልራህማን ቡርሃን አዲስ የተቋቋመው የሱዳን ሉአላዊ ምክር ቤት መሪ በመሆን በትናንትናው እለት ቃለ መሃላ ፈጽመዋል።

ጀኔራል ቡርሃን ከሦስት ዓመት በላይ የሽግግር ጊዜ ውስጥ የሉዓላዊ ሸንጎውን ለ21 ወራት በበላይነት የሚመሩት ሲሆን፥ የሲቪል ተወካዮች ደግሞ ቀጣዮቹን 18 ወራትን ይመራሉ።

ወታደራዊ ምክር ቤቱና የነጻነትና የለውጥ ኃይሎች ጥምረት የአገሪቱን የሽግግር መንግሥት ለመጀመር ባለፈው ቅዳሜ መፈራረማቸው ይታወሳል።

ምንጭ፦ ቢቢሲ

You might also like
Comments
Loading...