Fana: At a Speed of Life!

አምራች ኢንዱሰትሪውን ለማሳደግ የተቋቋሙ ኢንስቲትዩቶች ተልዕኳቸውን በአግባቡ ሊወጡ ይገባል ተባለ

አዲስ አበባ፣ ነሃሴ 7፣ 2011 (ኤፍ ቢ ሲ) ኢንስቲትዩቶች ችግር ፈቺ ጥናትና ምርምር በማካሄድ አምራች ኢንዱስትሪውን መደገፍ እንዳለባቸው የኢፌዴሪ ንግድና ኢንዱስትሪ ሚኒስቴር አስታወቀ።

ሚኒስቴር በመስሪያ ቤቱ የ2011 በጀት ዓመት እቅድ አፈጻጸሙን በስሩ ካሉ 15 ተጠሪ ተቋማት አመራሮች ጋር በቢሾፍቱ ከተማ እየገመገመ ይገኛል።

የንግድና ኢንዱስትሪ ሚኒስትር ወይዘሮ ፈትለወርቅ ገብረእግዚአብሔር በግምገማው ላይ እንደተናገሩት፥ ኢንስቲትዩቶች ኢንዱስትሪውን በሚፈለገው ደረጃ እየደገፉ አይደለም።

ኢንስቲትዩት ሆነው ሲቋቋሙ ዋና ተልኳቸው ጥናት በማካሄድ ኢንዱስትሪውን ማሳደግ በመሆኑ ወደዚህ መደበኛ ስራቸው ገብተው ችግር ፈች ጥናትና ምርምር በማካሄድ መደገፍ አለባቸው ብለዋል።

የወጪ ንግድ ችግሮችን በመለየት፣የሀገራትን የገበያ ፍላጎት እንዲሁም የምናመርታቸው ምርቶች ገበያ የሚያገኙበትን ሀገራት በመለየትና በማጥናት ለኢንዱስትሪው የመፍትሄ ምንጭ መሆን እንደሚገባቸውም ነው የጠቆሙት።

በሌላ በኩል ኢንስቲትዩቶች የራሳቸው ቢሮና የጥናትና ምርምር ቦታ እንዲኖራቸው ሚኒስቴሩ ድጋፍ ያደርጋል የተባለ ሲሆን፥ ሚኒስቴር መስሪያ ቤቱ ሀገሪቷ ያለባትን የውጪ ምንዛሪ ችግር ለመቅረፍ ያለው ሚና ትልቅ በመሆኑ ከብሄራዊ ባንክና ከኤሌክትሪክ ኃይል ጋር ያለውን ችግር ለመቅረፍ እየተሰራ መሆኑም ተነስቷል።

በተጨማሪም የሀገሪቷን አጠቃላይ ትራንስፎርሜሽን እውን ለማድረግ በአምራች ኢንዱስትሪው ዘርፍ ለውጥ ማምጣት ይገባል የተባለ ሲሆን፥ ለኢንዱስትሪዎች ምርታማነት የተለመደውን የስራ ባህላችንን መቀየር ያስፈልጋል ተብሏል።

አነስተኛና መካከለኛ አምራች ኢንዱስትዎች ገቢ ንግድን በሀገር ውስጥ ምርት በመተካት የውጭ ምንዛሪ እጥረትንና የዋጋ ንረትን ለመቀነስ እንዲችሉ የአስተሳሰብ ለውጥ የሚያመጣ ቀጣይነት ያለው የንቅናቄ ስራ መሰራት እንዳለበትም በውይይቱ ላይ ተገልጿል።

You might also like
Comments
Loading...