Fana: At a Speed of Life!

አሜሪካ ተጨማሪ የጦር መሳሪያዎችን ወደ ሶሪያ ላከች

አዲስ አበባ፣ነሃሴ 6፣ 2011(ኤፍ ቢ ሲ) አሜሪካ ተጨማሪ የጦር መሳሪያዎችን ወደ ሶሪያ መላኳ ተገልጿል።

ዋሽንግተን ባሳለፍነው ዓርብ ዕለት 70 በሚሆኑ መኪናዎች የተጫኑ የተለያዩ ወታደራዊ የጦር መሳሪያዎችን ወደ ሶሪያ መላኳን አናዶሉ የዜና ወኪል ዘግቧል።

የጦር መሳሪያዎቹ ወደ ሶሪያ የገቡት ኢራቅና ሶሪያ በሚዋሰኑበት ሴሜልካ ተብሎ በሚጠራው ድንበር አካባቢ ሲሆን፥ መዳረሻቸውንም በኤፋራጥስ ወንዝ  ምስራቃዊ ክፍል ማድረጋቸው ተገልጿል።

ወደ ቦታው ከተላኩት የጦር መሳሪያዎች ውስጥም የተለያዩ ዘመናዊ ብረት ለበስ ወታደራዊ ተሽከርካሪዎችና የግንባታ ዕቃዎች መካተታቸው ታውቋል።

ከዚህ ባለፈም በርካታ የነዳጅ ማመላለሻ ታንከሮችና መኪናዎች መኖራቸው ነው የተገለፀው።

ወታደራዊ መሳሪያወቹ በቀጠናው በስፋት ለሚንቀሳቀሱት ዋይ ፒ ጄ እና ፒ ኬኬ ለተሰኙ  የሽብር ቡድኖች የሚሰጡ መሆኑም በዘገባው ተመላክቷል።

አንካራና ዋሽንግተን በቅርቡ በሰሜን ሶሪያ የጋራ የሰላም መቆጣጠሪያ ማዕከል ለማቋቋም ስምምነት ላይ መድረሳቸው ይታወሳል።

የመቆጣጠሪያ ማዕከሉም አካባቢውን የሰላም ቀጠና ከማድረግ ባሻገር ከቀያቸው የተፈናቀሉ ዜጎችን ወደ ቀደመ ስፍራቸው ለመመለስ ያስችላል ተብሎ ነበር።

ከዚህ ባለፈም  በቀጠናው የሚንቀሳቀሱ የሽብር ቡድኖች የሚፈፅሙትን እኩይ ተግባር ለመከላከል የሚያስችል መሆኑ ተጠቁሟል።

ይሁን እንጂ አሜሪካ ቱርክ በአሸባሪነት ለፈረጀቻቸውና በቀጠናው በስፋት ለሚንቀሳቀሱት የሽብር ቡድኖች የምታቀርበው የጦር መሳሪያ ድጋፍ  ሀገራቱ  የገቡት ስምምነት ተግባራዊ እንዳይሆን የሚያስችል መሆኑ ተመላክቷል።

You might also like
Comments
Loading...