Fana: At a Speed of Life!

አሜሪካ ለታይዋን 66 ኤፍ16 ተዋጊ ጄቶችን ልትሸጥ ነው

አዲስ አበባ ፣ ነሃሴ 15 ፣ 2011 (ኤፍ ቢ ሲ) የአሜሪካ የውጭ ጉዳይ መስሪያ ቤት 66 ኤፍ16 ተዋጊ ጄቶችን ለታይዋን ለመሸጥ የቀረበውን ሃሳብ አፀደቀ።

ውጭ ጉዳይ መስሪያ ቤቱ አሜሪካ ለታይዋን የተሻሻሉትን ተዋጊ ጄቶች በ8 ቢሊየን ፓውንድ ለመሸጥ መወሰኗን አስታውቋል።

የተዋጊ ጄቶቹ ሽያጭ የታይዋንን የመከላከያ አቅም ለማሳደግና ሊቃጣባት የሚችልን ጥቃት ለመመከት የምታደርገውን ጥረት የሚያግዝ ነው ተብሏል።

የአሜሪካ መከላከያ ደህንነት ትብብር ኤጀንሲ በበኩሉ፥ የተዋጊ ጄቶቹ ሽያጭ በአካባቢው ያለውን ወታደራዊ የሃይል ሚዛን እንደማይለውጠውና የመከላከል አቅምን ለማሳደግ ያለመ መሆኑን ገልጿል።

ሽያጩ 75 የተዋጊ ጄት ሞተሮችንና ሌሎች እቃዎችን ያካተተ መሆኑም ነው የተነገረው።

የአሁኑ የአሜሪካ የሽያጭ ይሁንታ ግን ታይዋን ግዛቴ ናት የምትለው ቻይናን የሚያስደስት አይመስልም።

ታይዋን ከቻይና በኩል ስጋት አለብኝ በሚል ወታደራዊ አቅሟን እያሳደገች መሆኑ ይነገራል።

ለዚህም በተለያየ ጊዜ ከአሜሪካ ጋር ጥብቅ ወዳጅነት በመመስረት የጦር መሳሪያዎችን እየገዛች ትገኛለች።

የቻይና ጋዜጦች ደግሞ የአሁኑ አካሄድ ለቻይና ከባድ ማስጠንቀቂያ ነው እያሉ ነው።

የቻይና ውጭ ጉዳይ ሚኒስቴር ቃል አቀባይ ገንግ ሹዋንግ በበኩላቸው፥ አሜሪካ ለታይዋን የምታደርገው የጦር መሳሪያ ሽያጭ ሁለቱ ሃገራት የገቡትን ስምምነት የሚጥስ ነው ብለዋል።

ከዚህ ባለፈም ድርጊቱ በቻይና የውስጥ ጉዳይ ላይ ጣልቃ እንደመግባት ይቆጠራልም ነው ያሉት።

ዋሽንግተንም ለታይዋን የምታደርገውን የመሳሪያ ሽያጭ ማቆም እንዲሁም ከታይዋን ጋር ምንም አይነት ወታደራዊ ግንኙነት መመስረት እንደሌለባትም ገልጸዋል።

 

 

 

 

ምንጭ፦ አልጀዚራ

 

You might also like
Comments
Loading...