Fana: At a Speed of Life!

አልማ የትምህርት ተቋማትን ደረጃ ለማሻሻል ከ21 ቢሊየን ብር በላይ ሊሰበስብ መሆኑን አስታወቀ

አዲስ አበባ ፣ ነሃሴ 8 ፣ 2011 (ኤፍ ቢ ሲ) የአማራ አቀፍ ልማት ማኅበር (አልማ) በአማራ ክልል የሚገኙ የትምህርት ተቋማትን ደረጃ ለማሻሻል የሚያስችለውን የለውጥ ዕቅድ ለክልሉ ትምህርት ቢሮና ለአጋር አካላት አስተዋውቋል።

የአልማ ዋና ሥራ አስፈጻሚ አቶ መላኩ ፈንታ እንደተናገሩት ማኅበሩ ደረጃቸውን የጠበቁ የትምህርት ተቋማት ለትምህርት ጥራት የሚኖራቸውን ፋይዳ በመረዳት እየሠራ ነው።

ከ2012 እስከ 2014 ባሉት ጊዜያትም 21 ነጥብ 4 ቢሊየን ብር ከአባላቱ በመሰብሰብ ለትምህርት ቤቶች ግንባታ እንደሚያውል ተናግረዋል።

በዚህም በክልሉ አዳዲስ ትምህርት ቤቶችን የመገንባትና ነባሮቹን የማደስ ሥራ ይከናወናልም ነው ያሉት ዋና ስራ አስፈጻሚው።

በሁሉም ዞኖች አዳሪ ትምህርት ቤቶች እንዲኖሩ መታቀዱን ጠቅሰው ይህም አሁን በክልሉ ያለውንና 16 በመቶ የሆነውን ደረጃቸውን የጠበቁ ትምህርት ቤቶች ሽፋን ወደ 50 በመቶ ያሳድገዋል ብለዋል።

የአልማ የሕዝብ ግንኙነት ዳይሬክተር አቶ ዓለማየሁ ሞገስ በበኩላቸው ገንዘቡ በሀገር ውስጥ እና በውጭ ሀገራት ከሚገኙ አባላት፣ ከመንግሥትና ከሚመለከታቸው አካላት እንደሚሰበሰብ አስረድተዋል።

ከፊታችን ነሐሴ 21 ቀን 2011 ዓ.ም ጀምሮ የገቢ ማሰባሰቢያ መርሀ ግብር እንደሚጀምር ከአማራ መገናኛ ብዙሃን ድርጅት ያገኘነው መረጃ ያመላክታል።

 

You might also like
Comments
Loading...