Fana: At a Speed of Life!

በ6 ዓመታት ውስጥ ኢትዮጵያና ናይጄሪያ በሞባይል ስልክ ኢኮኖሚ ከሰሃራ በታች ከሚገኙ የአፍሪካ ሀገራት መካከል ቀዳሚዎቹ ይሆናሉ

አዲስ አበባ፣ ነሐሴ 2፣ 2011 (ኤፍ.ቢ.ሲ) ከዚህ ዓመት ጀምሮ እስከ አውሮፓውያኑ 2025 ድረስ ኢትዮጵያና ናይጄሪያ ከሰሃራ በታች ካሉ የአፍሪካ ሀገራት መካከል ከፍተኛ ቁጥር ያለው የሞባይል ስልክ ተጠቃሚ ቁጥር በመያዝ መሪ እንደሚሆኑ አንድ ጥናት አመለከተ።

በዓለም ዙሪያ የሚገኙ 750 የሞባይል ስልክ አገልግሎት አቅራቢ ኩባንያዎችን በመወከል ጥናት የሚያካሂደው ጂ ኤስ ኤም ኤ የተባለው ኩባንያ፥ በዘንድሮው የአውሮፓውያኑ ዓመት ጥናት ሪፖርቱ እንዳመለከተው ኢትዮጵያና ናይጄሪያ እስከ 2025 ድረስ በሞባይል ስልክ ኢኮኖሚ ውስጥ ግንባር ቀደም ይሆናሉ።

እንደ ሪፖርቱ በአውሮፓውያኑ 2018 ላይ ከሰሃራ በታች ባሉ የአፍሪካ ሀገራት 456 ሚሊየን የሞባይል ስልክ ተጠቃሚዎች ነበሩ።

2025 ላይ ይህ አሃዝ 623 ሚሊየን ይደርሳል ተብሎ እንደሚጠበቅ ነው ያመለከተው።

የሞባይል ስልክ ተጠቃሚ በፍጥነት ከሚያድግባቸው ሀገራት መካከልም ናይጄሪያ 19 በመቶ እና ኢትዮጵያ 11 በመቶ አድገት በማሳየት ግንባር ቀደም እንደሚሆኑ ጠቁሟል።

2018 ላይ 239 ሚሊየን የነበረው የሞባይል ኢንተርኔት ተጠቃሚዎች ቁጥርም በእነዚህ ዓመታት ውስ በ2025 483 ሚሊየን እንደሚደርስ ነው የተመለከተው።

ከሞባይል ስልክ ተጠቃሚዎች መካከል 2018 ላይ ከሰሃራ በታች ባሉት ሀገራት 39 በመቶ ሲሆን፥ ይህም አሃዝ 2025 ላይ 66 በመቶ ይደርሳል ተብሎ ነው የሚጠበቀው።

የሞባይል ኢንዱስትሪው የኦንላይን የክፍያ ስርዓትን በማቀላጠፍም ከሰሃራ በታች ባሉ የአፍሪካ ሀገራት ኢ-ኮመርስ እንዲስፋፋም አወንታዊ ሚና እንደሚጫወት በዚህ ሪፖርት ላይ ተጠቅሷል።

በአጠቃላይም 2018 ላይ የሞባይል ኢንዱሰትሪ ለአጠቃላይ የሀገር ውስጥ ምርት /ጂ ዲ ፒ/ 144 ቢሊየን የአሜሪካ ዶላር አስተዋፅኦ ያበረከተ ሲሆን፥ ከስድስት ዓመት በኋላ በ2025 አስተዋፅኦው 185 ቢሊየን የአሜሪካ ዶላር ይሆናል ተብሎ ይጠበቃል።

በጥናቱ ፈተናዎች ተብለው ከተነሱት ነጥቦች መካከል የሞባይል ኢንተርኔት ተጠቃሚዎች ቁጥር አድገት ላይ መሃይምነት፣ የክህሎት ጉድለት እና የዋጋ ውድነት አሉታዊ ተፅእኖ እንደሚኖራቸው ተነስቷል።

እነዚህ ፈተናዎች ሁለቱንም ፆታ የሚመለከቱ ቢሆንም ሴቶች ከወንዶች አንንፃር የሞባይል ኢንተርኔት ተጠቃሚነታቸው በ41 በመቶ ዝቅ እንደሚል ነው አነፃፅሮ የተነበየው።

You might also like
Comments
Loading...