Fana: At a Speed of Life!

በ300 ሚሊየን ዶላር የኢንዱስትሪ ፓርክ ሊገነባ ነው

አዲስ አበባ ፣ ነሃሴ 7 ፣ 2011 (ኤፍ ቢ ሲ) ኢትዮጵያ እና ቻይና በ300 ሚሊየን ዶላር የኢንዱስትሪ ፓርክ ሊገነቡ ነው።

ኢንዱስትሪ ፓርኩ በአዳማ ከተማ የሚገነባ ሲሆን፥ በማምረቻው ዘርፍ የተሰማሩ ባለሃብቶችን ለመሳብ ያለመ ነው ተብሏል።

በኢትዮጵያ የቻይና ኢኮኖሚና ንግድ ምክር ቤት ሚኒስትር ሊኡ ዩ፥ ኢንዱስትሪ ፓርኩን ለመገንባት የሚያስፈልጉ የመሬትና የፋይናንስ ስራዎች እየተከናወኑ መሆኑን ተናግረዋል።

ለኢንዱስትሪ ፓርኩ ግንባታ ከሚያስፈልገው ወጪ ውስጥ 85 በመቶው ከቻይና መንግስት በሚገኝ የረጅም ጊዜ ብድር የሚሸፈን ይሆናል።

ቀሪው 15 በመቶ ደግሞ የኢትዮጵያ መንግስት በቀጥታ ከሚመድበው ገንዘብ የሚሸፈን መሆኑንም ነው ሚኒስትሯ የተናገሩት።

በ100 ሄክታር መሬት ላይ የሚገነባው ኢንዱስትሪ ፓርክ ግንባታው ሲጠናቀቅ ለ25 ሺህ ዜጎች የስራ እድል እንደሚፈጥር ይጠበቃል።

የቻይናው ሲሲኢሲሲ ከዚህ ቀደም የአዳማ ኢንዱስትሪያል ፓርክን በ146 ሚሊየን ዶላር ገንብቶ አስረክቧል።

ባለፈው መስከረም ወር የተመረቀው ኢንዱስትሪ ፓርኩ በሙሉ አቅሙ ወደ ስራ ሲገባ ከ1 ቢሊየን የአሜሪካ ዶላር በላይ ከወጪ ንግድ ማግኘት እንደሚያስችል ታምኖበታል።

ከዚህ ባለፈም ከ60 ሺህ በላይ ለሚሆኑ ዜጎች ደግሞ የሥራ ዕድል ይፈጥራል ተብሎ ይጠበቃል።

ኢትዮጵያ በፈረንጆቹ 2025 ከግብርና መር ኢኮኖሚ በመውጣት ወደ ኢንዱስትሪ መር ኢኮኖሚ ለመሸጋገር እየሰራች ትገኛለች።

ለዚህም የተለያዩ የኢንዱስትሪ ፓርኮችን እየገነባች ሲሆን በቀጣዩ በጀት አመትም በአጠቃላይ 30 ኢንዱስትሪ ፓርኮች እንዲኖሯት እየሰራች ትገኛለች።

 

 

ምንጭ፦ china.org.cn

You might also like
Comments
Loading...